മനസിന്റെയും ശരീരത്തിന്റെയും ഊർജ്ജം പെട്ടെന്ന് പോയതായി ഇടയ്ക്ക് തോന്നാറില്ലേ? ഭക്ഷണം, വിശ്രമം എന്നിവയിലെ കുറവ്, ടെൻഷൻ, വിഷമം എല്ലാം ഊർജ്ജക്കുറവിന് കാരണമാകാറുണ്ട്. ഇതിന് ചെറിയൊരു ആശ്വാസം നൽകി മനസിനെയും ശരീരത്തേയും ഒന്ന് ഉഷാറാക്കാം.
മെഡിറ്റേഷന്റെ ഭാഗമായുള്ള ഷേക്കിംഗ് ആണ് ഇതിനുള്ള വഴി. വലിയ ആയാസമില്ലാതെ 15 മിനിറ്റുകൊണ്ട്, ശരീരത്തിനും മനസിനും ഉണ്ടായ ഉത്സാഹക്കുറവ് നമുക്ക് അൽപ്പമെങ്കിലും കുറയ്ക്കാം. കേൾക്കുമ്പോൾ ഇതെന്ത് കൂത്തെന്ന് തോന്നി മൂക്കത്ത് വിരൽ വയ്ക്കുമെങ്കിലും ഷേക്കിംഗ് ബോഡി എന്ന വിദ്യയിൽ കാര്യമൊക്കെയുണ്ട്. മനുഷ്യർ ഈ രീതി പിന്തുടരുന്നില്ലെങ്കിലും പൂച്ചയും നായയും എല്ലാം ഇങ്ങനെ ശരീരം വിറപ്പിച്ച്, കുലുക്കി ഊർജ്ജസ്വലരാവാറുണ്ട്.
ചെയ്യേണ്ട രീതി
എഴുന്നേറ്റ് നിന്ന് കാലുകൾ അൽപം അകറ്റി വയ്ക്കുക. കാൽമുട്ടുകളും കൈകളും ആയാസരഹിതമായി ഇടുക. മുട്ടുകളിൽ നിന്നും ശരീരം കുലുക്കിത്തുടങ്ങുക. ശരീരത്തിൽ ആകമാനം ഇത് എത്തണം. കാൽമുട്ടുകളിൽ തുടങ്ങി ഷോൾഡർ, കൈകൾ എന്നിവയിലൂടെ കടന്ന് ശരീരമാകമാനം ഇളക്കാം. ഇത് 15 മിനിറ്റു നേരം ചെയ്യാം. ശരീരത്തിൽ ഊർജം നിറയുന്നത് നിങ്ങൾക്ക് അനുഭവപ്പെടും. ക്ഷീണമകലും. ശരീരവും മനസും ഒപ്പം റിലാക്സ് ആകും. പാട്ടിന്റെയോ മറ്റോ അകമ്പടിയോടെ ഇത് ചെയ്യുന്നതും ഗുണകരമാണ്. തലച്ചോറിന്റെ ആരോഗ്യത്തിന് ഏറെ നല്ലതാണ് ഈ ടിപ്പ്. ഒരു ദിവസം മുഴുവൻ ഉന്മേഷമായിരിക്കാൻ രാവിലെ ചെയ്യുന്നതാവും ഉചിതം. യോഗ ചെയ്യുന്ന അതേ ഏകാഗ്രതയോടെയാവണം ഇത്.
ഇത് പാരാസിംപതറ്റിക് നെർവസ് സിസ്റ്റത്തെ ഉദ്ദീപിപ്പിക്കുന്നു. ഇത് ശരീരത്തിനും മനസിലും ശാന്തത നൽകുന്നു. ലിംഫാറ്റിക് സിസ്റ്റത്തെ ആക്ടീവാക്കുന്നതിനാൽ ഇത് ടോക്സിനുകൾ പുറന്തള്ളാനും സഹായിക്കുന്നു
