മലപ്പുറം: കരിപ്പൂർ വിമാനത്താവളം വഴി സ്വർണം കടത്താൻ ശ്രമിച്ചയാൾ പിടിയിൽ. 42 ലക്ഷം രൂപയുടെ സ്വർണമാണ് യാത്രക്കാരനിൽ നിന്നും കസ്റ്റംസ് പിടിച്ചെടുത്തത്. സംഭവത്തിൽ കുറ്റിപ്പുറം സ്വദേശി മുഹമ്മദ് ഇഷാഖിനെ പോലീസ് അറസ്റ്റ് ചെയ്തു. 814 ഗ്രാം സ്വർണം വാട്ടർ ടാപ്പിൽ ഒളിപ്പിച്ചാണ് ഇയാൾ കടത്താൻ ശ്രമിച്ചതെന്ന് കസ്റ്റംസ് പറയുന്നു.
കഴിഞ്ഞ ദിവസം 42 ലക്ഷം രൂപയുടെ സ്വർണവുമായി കാഞ്ഞങ്ങാട് സ്വദേശി കരിപ്പൂർ വിമാനത്താവളത്തിൽ പിടിയിലായിരുന്നു. 760 ഗ്രാം സ്വർണം ക്യാപ്സൂൾ രൂപത്തിലാക്കി ശരീരത്തിനുള്ളിൽ ഒളിപ്പിച്ചായിരുന്നു യാത്രക്കാരൻ കടത്താൻ ശ്രമിച്ചത്. കസ്റ്റംസിന്റെ കണ്ണുവെട്ടിച്ച് എയർപോർട്ടിന് പുറത്തുകടന്ന യാത്രക്കാരനെ പോലീസാണ് പിടികൂടിയത്.
