സമൂഹമാദ്ധ്യമങ്ങളിൽ ഇപ്പോൾ മോഹൻലാൽ സിനിമകളെപ്പറ്റിയാണ് ചർച്ച. അടുത്തിടെ മലയാള സിനിമയിൽ നടന്ന ഏറ്റവും വലിയ പ്രഖ്യാപനങ്ങളിൽ രണ്ട് എണ്ണം മോഹൻലാൽ ചിത്രങ്ങളാണ്. ഒന്ന്, ഭദ്രൻ സംവിധാനം ചെയ്ത സൂപ്പർഹിറ്റ് ചിത്രമായ ആടുതോമയുടെ 4K റിലീസും മറ്റൊന്ന്, മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്യുന്ന ചിത്രവും. ഇരു സിനിമകളെപ്പറ്റിയും ആരാധകരും സിനിമാ പ്രേമികളും ചർച്ച നടത്തുമ്പോൾ, ഒരു പിടിയും തരാത്ത ഒരു ചിത്രം പങ്കുവെച്ചിരിക്കുകയാണ് മോഹൻലാൽ. തന്റെ ഫെയ്സ്ബുക്ക് പേജിലാണ് മണ്ണിന്റേതെന്ന് തോന്നിപ്പിക്കുന്ന ചിത്രം താരം പങ്കുവെച്ചിരിക്കുന്നത്. പിന്നാലെ, ഇതെന്തിന്റെ സൂചനയാണ് എന്നറിയാനുള്ള ആകാംക്ഷയിലാണ് ആരാധകർ.
ചിത്രത്തിന്റെ താഴെ ആരാധകർ അവരുടെ സംശയങ്ങൾ കമന്റുകളായി രേഖപ്പെടുത്തുകയാണ്. ‘ഈ പേജ് ഹാക്ക് ചെയ്തോ’, ‘ഇത് എന്താണ്? പുതിയ സിനിമയുടെ ലൊക്കേഷൻ ആണോ’, ‘എനിക്ക് തോന്നുന്നത്, സ്ഫടികം സിനിമയിൽ തുടക്കത്തിൽ ആടുതോമ ഓടി വരുന്ന സീനിലെ ബാക്ക്ഗ്രൗണ്ട് ആണെന്നാണ്’, ‘Ljp-യുടെ കൂടെ കൂടിയതിന്റെ അറിയാനുണ്ട്’, ‘മറ്റൊരു ചുരുളി ആണെന്ന് തോന്നുന്നു’ എന്നിങ്ങനെ നീളുന്നു കമന്റുകൾ. അതേസമയം, ലിജോ ജോസ് പെല്ലിശ്ശേരിയുടെ ചിത്രത്തിന്റെ അപ്ഡേറ്റ് ഉടനെ ഉണ്ടാകുമെന്ന വാർത്തിയ്ക്കിടെയാണ് ആരാധകരെ കുഴപ്പത്തിലാക്കുന്ന ചിത്രവുമായി മോഹൻലാൽ വന്നിരിക്കുന്നത്. എന്നാൽ ചിത്രം ലിജോയുടെ സിനിമയുടേത് തന്നെ എന്ന് ഉറപ്പ് നൽകിയിരിക്കുകയാണ് നിർമ്മാതാക്കളായ ജോൺ ആൻഡ് മേരി ക്രിയേറ്റീവ്.
ഡിസംബർ 23-ന് ചിത്രത്തിന്റെ ടൈറ്റിൽ പ്രഖ്യാപിക്കുമെന്നാണ് പുറത്തു വരുന്ന റിപ്പോർട്ടുകൾ. സിനിമയുടെ ചിത്രീകരണം ജനുവരി 10-ന് രാജസ്ഥാനിൽ ആരംഭിക്കുമെന്നും വാർത്തകൾ വന്നിരുന്നു. ജോൺ ആൻഡ് മേരി ക്രിയേറ്റീവിന്റെ ബാനറിൽ ഷിബു ബേബി ജോൺ ആണ് മോഹൻലാൽ-ലിജോ ജോസ് പെല്ലിശ്ശേരി കൂട്ടുകെട്ടിൽ ഒരുങ്ങുന്ന ചിത്രം നിർമ്മിക്കുന്നത്. ഇക്കഴിഞ്ഞ ഒക്ടോബർ 25-നാണ് ഔദ്യോഗികമായി സിനിമ പ്രഖ്യാപിച്ചത്.
