പ്രകൃതിയിലെ അത്ഭുതങ്ങൾ നമ്മെ വിസ്മയിപ്പിക്കുമ്പോഴും, മറുവശം നമ്മെ ഭയപ്പെടുത്താറുണ്ട്. ചിലരെയെങ്കിലും പ്രകൃതിയുടെ ചില സൃഷ്ടികൾ ജീവിതം മുഴുവൻ ഭയപ്പെടുത്തും. അത്തരത്തിൽ പലരുടെയും ഭയമാണ് പാമ്പ്. വിഷമുള്ളതും വിഷമില്ലാത്തതുമടക്കം ലോകത്ത് എണ്ണമറ്റ ഇനം പാമ്പുകളുണ്ട്. എന്നാൽ ഈ പാമ്പുകളിൽ പലതിന്റേയും വിഷത്തിന് പ്രതിവിഷവുമുണ്ട് എന്നതാണ് നമ്മളെ ആശ്വസിപ്പിക്കുന്നത്. എന്നാൽ ചില പാമ്പുകൾ കടിച്ചാൽ ഉടൻ തന്നെ ആശുപത്രിയിൽ എത്തിച്ച് കൃത്യമായ ചികിത്സ നൽകിയില്ലെങ്കിൽ മരണം ഉറപ്പ്. അത്തരത്തിൽ, ലോകത്തിലെ ഏറ്റവും മാരകമായ വിഷപ്പാമ്പുകളില് ഒന്നിനെ പരിചയപ്പെടാം.
തലയിലും വാലറ്റത്തും കടുത്ത ചുവപ്പ് നിറവും ദേഹം മുഴുവന് നീല നിറവുമുള്ള ബ്ലൂ കോറല് ആണിത്. ഇവയുടെ വിഷം വേദനസംഹാരിയായും ഉപയോഗിക്കാൻ കഴിയുമെന്ന് ഗവേഷകര് മുമ്പ് കണ്ടെത്തിയിട്ടുണ്ട്. അതിവേഗം സഞ്ചരിക്കാൻ കഴിയും എന്നതാണ് ബ്ലൂ കോറല്ലിന്റെ പ്രധാന പ്രത്യേകതകളിൽ ഒന്ന്. വിഷത്തിന് കാഠിന്യമുള്ളതിനാൽ ‘കൊലയാളികളിലെ കൊലയാളി’ എന്ന് ഇവയെ വിശേഷിപ്പിക്കുന്നു. ഇവയുടെ ഭക്ഷണം എന്താണെന്ന് മനസ്സിലാക്കിയാൽ തന്നെ ഈ വിശേഷണം ശരിയാണെന്ന് തോന്നിപോകും. വലിപ്പം കുറഞ്ഞ രാജവെമ്പാലകളെയാണ് ബ്ലൂ കോറല് ഭക്ഷണമാക്കുന്നത്.
രാജവെമ്പാലയുടെ വിഷം ഇവക്ക് തെല്ലും ഏൽക്കില്ല. തെക്കന് ഏഷ്യയിലാണ് ബ്ലൂ കോറൽ കാണപ്പെടുന്നത്. മനുഷ്യ സാമീപ്യമുളളിടത്ത് അധികം ഇവയെ കാണാറില്ല. 2 മീറ്റര് വരെ നീളം വയ്ക്കും ഇവയ്ക്ക്. ബ്ലൂ കോറലിന്റെ വിഷഗ്രന്ഥിക്ക് 60 സെന്റിമീറ്റർ നീളമുണ്ട്. അതായത് ശരീരത്തിന്റെ നാലിലൊന്ന് നീളം. ബ്ലൂ കോറല്ലിന്റെ വിഷം സംബന്ധിച്ചുള്ള വിശദാംശങ്ങള് കുറച്ചുനാൾ മുമ്പ് വരെ അജ്ഞാതമായിരുന്നു. ഓസ്ട്രേലിയയിലെ ചില ഗവേഷകരാണ് ബ്ലൂ കോറലിന്റ വിഷത്തില് നിന്ന് വേദന സംഹാരി ഉൽപാദിപ്പിക്കാമെന്ന് കണ്ടെത്തിയത്.
