സിനിമാ പ്രേമികൾക്കിടയിൽ ഇപ്പോൾ മോഹൻലാൽ-ലിജോ ചിത്രത്തെപ്പറ്റിയാണ് ചർച്ച. ഡിസംബർ 23-ന് ചിത്രത്തിന്റെ ടൈറ്റിൽ പ്രഖ്യാപിക്കുമെന്നിരിക്കെ ആരാധകരെ ആകാംക്ഷയുടെ മുൾമുനയിൽ നിർത്തുകയാണ് സമൂഹമാദ്ധ്യമങ്ങളിൽ മോഹൻലാൽ പങ്കുവെയ്ക്കുന്ന ഓരോ ചിത്രങ്ങളും. ഓരോ ഭാഗങ്ങളായി പങ്കുവെയ്ക്കുന്ന ചിത്രങ്ങൾ കൂട്ടി യോജിപ്പിച്ചാൽ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി ഒരുക്കുന്ന ചിത്രത്തിന്റെ പേര് ലഭിക്കും. നിലവിൽ അണിയറ പ്രവർത്തകർ പങ്കുവെച്ച ചിത്രങ്ങൾ എല്ലാം കൂട്ടി യോജിപ്പിച്ചു കൊണ്ട് സിനിമയുടെ പേര് ഊഹിച്ചെടുക്കുകയാണ് മലയാളികൾ. വാലിബൻ, വല്ലഭൻ, ഫയൽവാൻ, വീരൻ, വരത്തൻ എന്നിങ്ങനെ നീളുന്നു സിനിമാ പ്രേമികൾ ഊഹിച്ചെടുത്ത പേരുകൾ.
ചിത്രത്തിന്റെ പേരും മോഹൻലാലിന്റെ കഥാപാത്രവും എന്താണെന്നറിയാനുള്ള കാത്തിരിപ്പിലാണ് ആരാധകർ. ഡിസംബർ 23-ന് വൈകിട്ട് 5 മണിക്കാണ് സിനിമയുടെ ടൈറ്റിൽ പ്രഖ്യാപിക്കുക. ജനുവരി 10-ന് രാജസ്ഥാനിൽ സിനിമയുടെ ചിത്രീകരണം ആരംഭിക്കുമെന്നും റിപ്പോർട്ടുകളുണ്ട്. ജീത്തു ജോസഫ് ചിത്രമായ റാമിന്റെ ചിത്രീകരണം പൂർത്തിയാക്കിയ ശേഷമായിരിക്കും ലിജോയുടെ ചിത്രത്തിൽ മോഹൻലാൽ ജോയിൻ ചെയ്യുക.
ജോൺ ആൻഡ് മേരി ക്രിയേറ്റീവിന്റെ ബാനറിൽ ഷിബു ബേബി ജോൺ ആണ് മോഹൻലാൽ-ലിജോ ജോസ് പെല്ലിശ്ശേരി കൂട്ടുകെട്ടിൽ ഒരുങ്ങുന്ന ചിത്രം നിർമ്മിക്കുന്നത്. ഇക്കഴിഞ്ഞ ഒക്ടോബർ 25-നാണ് ഔദ്യോഗികമായി സിനിമ പ്രഖ്യാപിച്ചത്. വെല്ലുവിളികൾ നിറഞ്ഞതും ഭയങ്കര ചലഞ്ചിംഗ് ആയ സിനിമയുമാണ് ലിജോ-മോഹൽലാൽ കൂട്ടുകെട്ടിൽ വരാൻ പോകുന്നതെന്ന് നടൻ പൃഥ്വിരാജും പറഞ്ഞിരുന്നു.
Comments