വീടുകൾ പണിതുയർത്തുമ്പോൾ നാം ഏറ്റവുമധികം ശ്രദ്ധിക്കുന്നത് എല്ലാം അതിന്റേതായ സ്ഥാനത്ത് തന്നെയാണോയെന്നാണ്. എത്ര ചെറിയ തുക മുടക്കി പണിയുന്ന വീടായാലും അടുക്കളയും ബെഡ്റൂമും എല്ലാം കൃത്യസ്ഥാനത്ത് തന്നെയാകും നിർമ്മിക്കുക. അപ്പോൾ പിന്നെ ഒത്തിരി പണം മുടക്കി പണിയുന്ന വീടാണെങ്കിലോ.. എല്ലാം കിറുകൃത്യമായിരിക്കും. കൂടുതൽ സൗകര്യങ്ങളുമുണ്ടായിരിക്കും. എന്നാൽ ഏറെ വ്യത്യസ്തമായി പണിതിരിക്കുന്ന ഒരു വീടാണ് ഇപ്പോൾ ചർച്ചയാകുന്നത്.
ഏറ്റവും വിചിത്രവും വിപരീതവുമായ രീതിയിലാണ് ഈ വീടിന്റെ ടോയ്ലെറ്റ് സ്ഥാപിച്ചിരിക്കുന്നത്. എന്നിട്ടും ഈ വീട് വിറ്റുപോയത് 1.2 കോടി രൂപയ്ക്കാണെന്നാണ് റിപ്പോർട്ട്. വീടിനുള്ളിൽ യാതൊരു മറയുമില്ലാതെ ഹാളിന് നടുക്കാണ് കക്കൂസ് പണിതിരിക്കുന്നത്. എന്നിട്ടും മൂന്ന് മുറികളടങ്ങുന്ന വീട് 1.2 കോടി രൂപയ്ക്ക് വിറ്റുപോയെന്ന വാർത്ത കണ്ട് അമ്പരന്നിരിക്കുകയാണ് സോഷ്യൽ മീഡിയ. യുകെയിലാണ് സംഭവം.
മാഞ്ചസ്റ്ററിലെ ഓൾഡ്ഹാമിൽ സ്ഥിതി ചെയ്യുന്ന വിചിത്ര വീടാണ് കോടികൾക്ക് വിറ്റുപോയിരിക്കുന്നത്. മൂന്ന് ബെഡ്റൂമുകൾ കൂടാതെ വിസ്താരമുള്ള ഡൈനിംഗ് ഹാളും അടുക്കളയുമെല്ലാം വീട്ടിലുണ്ട്. വീടിന്റെ ഒത്ത നടുക്കിലായി എല്ലാവർക്കും എത്തിച്ചേരാൻ കഴിയുന്ന ഇടത്തിൽ സ്ഥാപിച്ചിരിക്കുകയാണ് ടോയ്ലെറ്റ്. എന്തുകൊണ്ടാണ് ഇത്തരത്തിൽ കക്കൂസ് സ്ഥാപിച്ചതെന്നോ എന്നിട്ടും ഇത്രവലിയ തുകയ്ക്ക് എങ്ങനെ ഈ വീട് വിറ്റുപോയെന്നോ ഇതുവരെയും വ്യക്തമല്ല. എന്നിരുന്നാലും വീടിന്റെ ചിത്രം സോഷ്യൽ മീഡിയയിൽ വൈറലാവുകയാണ്.
Comments