ന്യൂഡൽഹി: പ്രധാനമന്ത്രി നരേന്ദ്രമോദിയും യുകെ രാജാവായ ചാൾസ് മൂന്നാമനും ഫോണിലൂടെ ആശയവിനിമയം നടത്തി. യുകെയുടെ രാജാവായതിന് ശേഷം ചാൾസ് മൂന്നാമന്റെയും മോദിയുടെയും ആദ്യ സംഭാഷണമാണിത്. വിജയകരമായ രീതിയിൽ ഭരണം നടത്താൻ സാധിക്കട്ടെയെന്ന് ചാൾസ് മൂന്നാമനെ മോദി ആശംസിച്ചു.
ഫോൺ സംഭാഷണത്തെക്കുറിച്ചുള്ള വിശദാംശങ്ങൾ പ്രധാനമന്ത്രി ട്വിറ്ററിൽ കുറിച്ചിരുന്നു. പരിസ്ഥിതി സംരക്ഷണം, കാലാവസ്ഥാ പ്രതിരോധം, പരസ്പര താൽപര്യങ്ങൾ, പൊതുനന്മ തുടങ്ങിയ വിഷയങ്ങൾ ചർച്ച ചെയ്തതായി മോദി അറിയിച്ചു. ഇന്ത്യ ജി20 അദ്ധ്യക്ഷത വഹിക്കുന്നതിനെക്കുറിച്ചും സംസാരിച്ചുവെന്ന് പ്രധാനമന്ത്രി പറഞ്ഞു.
It was a pleasure to speak with His Majesty King Charles III on issues of mutual interest, including environmental protection, climate resilience, and the Commonwealth. Also discussed the priorities of India's G20 Presidency, and the potential of Mission LiFE. @RoyalFamily
— Narendra Modi (@narendramodi) January 3, 2023
ഇരുരാജ്യങ്ങൾക്കും പരസ്പര താൽപര്യമുള്ള നിരവധി കാര്യങ്ങൾ സംഭാഷണത്തിനിടയിൽ വിഷയങ്ങളായിരുന്നു. ജൈവ വൈവിധ്യ സംരക്ഷണം, കാലാവസ്ഥാ വ്യതിയാനം, ഊർജ പരിവർത്തനങ്ങൾക്കായി ധനസഹായം നൽകുന്നതിനുള്ള നൂതന മാർഗങ്ങൾ എന്നീ കാര്യങ്ങൾ ചർച്ചയുടെ ഭാഗമായി. ഇത്തരം വിഷയങ്ങളിൽ രാജാവ് പ്രകടിപ്പിച്ച താത്പര്യത്തെയും പ്രധാനമന്ത്രി മോദി അനുമോദിച്ചു.
ഇരുരാജ്യങ്ങളും പൊതുനന്മയ്ക്ക് വേണ്ടി എപ്രകാരമാണ് പ്രവർത്തനങ്ങൾ ശക്തിപ്പെടുത്തേണ്ടത് എന്നതു സംബന്ധിച്ച് രണ്ട് നേതാക്കളും കാഴ്ചപ്പാടുകൾ പങ്കുവച്ചു. ഇന്ത്യയുടെയും യുകെയുടെയും ഇടയിൽ ജീവനുള്ള പാലമായി പ്രവർത്തിക്കുന്ന യുകെയിലെ ഇന്ത്യൻ സമൂഹത്തെയും മോദി അഭിനന്ദിച്ചു.
യുകെയുടെ പരമാധികാരിയായിരുന്ന എലിസബത്ത് രാജ്ഞിയുടെ നിര്യാണത്തിന് ശേഷമായിരുന്നു ചാൾസ് മൂന്നാമൻ രാജാവായി അധികാരത്തിലേറിയത്. 2022 സെപ്റ്റംബർ എട്ടിനായിരുന്നു എലിസബത്ത് രാജ്ഞി അന്തരിച്ചത്.
Comments