‘ആയുരാരോഗ്യങ്ങൾ നേരുന്നു‘: മമത ബാനർജിക്ക് പിറന്നാൾ ആശംസകൾ നേർന്ന് പ്രധാനമന്ത്രി- PM Modi wishes Mamata Banerjee on her Birthday

ന്യൂഡൽഹി: പശ്ചിമ ബംഗാൾ മുഖ്യമന്ത്രി മമത ബാനർജിയുടെ അറുപത്തിയെട്ടാം ജന്മദിനത്തിൽ ആശംസകൾ നേർന്ന് പ്രധാനമന്ത്രി നരേന്ദ്ര മോദി.

‘മമത ദീദിക്ക് പിറന്നാൾ ആശംസകൾ. അവർക്ക് ആയുരാരോഗ്യ സൗഖ്യങ്ങൾ നേരുന്നു.‘ പ്രധാനമന്ത്രി ട്വീറ്റ് ചെയ്തു.

പശ്ചിമ ബംഗാൾ ഗവർണർ സി വി ആനന്ദ ബോസ്, അസം മുഖ്യമന്ത്രി ഹിമന്ത ബിശ്വ ശർമ്മ, തമിഴ്നാട് മുഖ്യമന്ത്രി എം കെ സ്റ്റാലിൻ തുടങ്ങിയവരും മമതക്ക് ആശംസകൾ നേർന്നു.

‘മമത ബാനർജിക്ക് ആരോഗ്യവും നന്മകളും ആശംസിക്കുന്നു. ബംഗാൾ മാത്രമല്ല രാജ്യവും മമതയിൽ നിന്നും ധാരാളം നേട്ടങ്ങൾ പ്രതീക്ഷിക്കുന്നു എന്നായിരുന്നു ഗവർണർ സി വി ആനന്ദ ബോസിന്റെ കുറിപ്പ്.

1955 ജനുവരി 5ന് കൊൽക്കത്തയിലായിരുന്നു മമത ബാനർജിയുടെ ജനനം. 1998ലാണ് കോൺഗ്രസുമായി തെറ്റിപ്പിരിഞ്ഞ് അവർ തൃണമൂൽ കോൺഗ്രസ് രൂപീകരിച്ചത്. 34 വർഷത്തെ ഇടത് ഭരണം അവസാനിപ്പിച്ച് 2011ലാണ് മമത ബാനർജി പശ്ചിമ ബംഗാൾ മുഖ്യമന്ത്രിയാകുന്നത്.