തിരുവനന്തപുരം: ദേശീയപാതയുടെ നിർമ്മാണ പ്രവർത്തനങ്ങൾ അതിവേഗം പൂർത്തീകരിക്കുന്ന പിണറായി സർക്കാരിന് അഭിനന്ദനവുമായി മുൻ ആരോഗ്യമന്ത്രി പി.കെ ശ്രീമതി. കാർ യാത്രയ്‌ക്കിടെ ദേശീയപാതയുടെ നിർമ്മാണ പ്രവർത്തനങ്ങളുടെ വീഡിയോ പങ്കുവെച്ചാണ് ശ്രീമതി കേരള സർക്കാരിനെ പുകഴ്‌ത്തിയത്.
ഗ്രാമങ്ങളുടെയും നഗരങ്ങളുടെയും മുഖച്ഛായ തന്നെ മാറി പോയെന്നും ഇത്രയും വേഗം നാഷണൽ ഹൈവേയുടെ നിർമ്മാണ പ്രവർത്തനങ്ങൾ പൂർത്തിയാകുമെന്ന് ജനങ്ങൾ പോലും വിശ്വസിച്ചിട്ടുണ്ടാകില്ലെന്നാണ് ശ്രീമതി ടീച്ചറുടെ അഭിപ്രായ പ്രകടനം. കാസർകോട് മുതൽ തിരുവനന്തപുരം വരെ അതിവേഗത്തിൽ ഇനി ജനങ്ങൾക്ക് യാത്ര ചെയ്യാം. അപകടമോ തടസ്സമോ ഉണ്ടാവില്ല. ഇത്രയും വേഗം നാഷണൽ ഹൈവേ പ്രായോഗികമാക്കിയ എൽഡിഎഫ് സർക്കാരിനെ എത്ര അഭിനന്ദിച്ചാലും മതിയാവില്ലെന്നും ശ്രീമതി ടീച്ചർ വീഡിയോയിൽ പുകഴ്ത്തി പറയുന്നുണ്ട്. അഭിനന്ദത്തിന്റെ വാക്കുകൾ കുറഞ്ഞുപോയാലെ സംശയമുള്ളുവെന്നായിരുന്നു അവരുടെ പ്രതികരണം.
വീഡിയോയ്‌ക്ക് പിന്നാലെ നിരവധി പേരാണ് പ്രതികരണവുമായി രംഗത്തെത്തിയത്. കേന്ദ്ര സർക്കാരിന്റെ പദ്ധതിയാണ് ദേശീയ പാത എന്ന് പോലും അറിയാത്ത ആളാണോ പി.കെ ശ്രീമതി എന്നാണ് സമൂഹമാദ്ധ്യമങ്ങളിൽ നിറയുന്ന പരിഹാസം. ഒരു സംഘടനയുടെ അഖിലേന്ത്യ നേതാവല്ലേ താങ്കളെന്നും ഇതിനെ കുറിച്ച് പഠിച്ചിട്ട് ഇത്തരം വീഡിയോ പോസ്റ്റ് ചെയ്താൽ പോരെ എന്നുമാണ് മറ്റ് ചിലരുടെ പ്രതികരണം.
