പലർക്കും ഇഷ്ടപ്പെട്ട വിഭവമാണ് മസാലദോശ. ഹോട്ടലുകളിലെ മസാല ദോശയുടെ രുചി പിടിച്ചുപോയാൽ പിന്നെ പറയുകയേ വേണ്ട. എന്നാൽ, മസാല ദോശ കഴിക്കണമെന്ന് തോന്നുമ്പോൾ എല്ലാം ഹോട്ടലിൽ പോകാൻ പറ്റിയെന്ന് വരില്ല. ഈ സമയം ദോശ വീട്ടിലുണ്ടാക്കാൻ കഴിഞ്ഞിരുന്നുവെങ്കിൽ എന്ന് നാം ചിന്തിച്ച് പോകും. പക്ഷെ, ഹോട്ടലിലെ പോലെ രുചികരമായ മസാല ദോശ എങ്ങനെ വീട്ടിലുണ്ടാക്കാം എന്ന് പർക്കും അറിയില്ല. എന്നാൽ, നല്ല ക്രിസ്പി മസാല ദോശ വീട്ടിലും തയ്യാറാക്കാം. അത് എങ്ങനെയന്ന് നമുക്ക് നോക്കാം,
ആവശ്യമുള്ള സാധനങ്ങള്
പച്ചരി – മുക്കാല്കപ്പ്
ഉലുവ – ഒരു നുള്ള്
ഉഴുന്ന് – അരക്കപ്പ്
റവ- അരക്കപ്പ്
കാരറ്റ് – അരക്കപ്പ്
ഉരുളക്കിഴങ്ങ് – മൂന്നെണ്ണം
ഇഞ്ചി – അരക്കഷ്ണം
ഉള്ളി – 3 എണ്ണം
പച്ചമുളക് – 3 എണ്ണം
കറിവേപ്പില- ആവശ്യത്തിന്
തക്കാളി- 2 എണ്ണം
മഞ്ഞള്പ്പൊടി – കാല് ടീസ്പൂണ്
ഉപ്പ്- പാകത്തിന്
അരിയും ഉഴുന്നും ഉലുവയും നാല് മണിക്കൂര് വെള്ളത്തില് കുതിര്ക്കുക. ഇതോടൊപ്പം റവയും കുതിര്ക്കുക. ഇത് നല്ലതുപോലെ അരച്ചെടുത്ത് കുറച്ച് സമയം പുളിക്കുന്നതിന് വേണ്ടി വെയ്ക്കുക. അതിന് ശേഷം ഉരുളക്കിഴങ്ങ്, കാരറ്റ് എന്നിവ നല്ലതുപോലെ വേവിച്ചെടുത്ത് ഉടയ്ക്കുക. അതിന് ശേഷം ഉള്ളിയും പച്ചമുളകും തക്കാളിയും ചെറുതായി അരിഞ്ഞെടുക്കുക. വേറൊരു പാനില് എണ്ണയൊഴിച്ച് കടുക് പൊട്ടിച്ച് ഉള്ളിയും പച്ചമുളും കറിവേപ്പിലയും കൂടി വഴറ്റിയെടുക്കുക. നല്ലതുപോലെ വഴറ്റിയെടുത്ത ശേഷം ഇതിലേക്ക് തക്കാളി ചേര്ക്കുക. അത് നല്ലതുപോലെ ഉടച്ചെടുത്ത ശേഷം ഉരുളക്കിഴങ്ങും കാരറ്റും മിക്സ് ചെയ്ത് മഞ്ഞള്പ്പൊടിയും ഉപ്പും ചേര്ത്ത് വേവിച്ചെടുക്കുക. അടുത്തതായി ദോശക്കല്ല് അടുപ്പില് വച്ച് ചൂടാക്കിയെടുക്കുക. അതിലേക്ക് അല്പം എണ്ണ പുരട്ടി ഇതിലേക്ക് ദോശമാവ് കോരിയൊഴിക്കുക. ദോഷ പരത്തിയ ശേഷം ഇതിലേക്ക് ഉരുളക്കിഴങ്ങ് മസാല പുരട്ടി ചുരുട്ടിയെടുക്കാവുന്നതാണ്. സ്വാദിഷ്ഠമായ നല്ല ക്രിസ്പി മസാല ദോശ തയ്യാര്.
Comments