ന്യൂഡൽഹി: 2023-24ലെ കേന്ദ്ര ബജറ്റ് പ്രഖ്യാപനത്തിൽ വിദ്യാഭ്യാസ മേഖലയിലും സുപ്രധാന തീരുമാനങ്ങൾ. കേന്ദ്ര സർക്കാരിന്റെ ഏകലവ്യ മോഡൽ സ്കൂൾ പദ്ധതിക്ക് കീഴിൽ 38,000 അദ്ധ്യാപകരെ നിയമിക്കുമെന്ന് ധനമന്ത്രി പ്രഖ്യാപിച്ചു. പട്ടികജാതി, പട്ടിക വർഗ വിഭാഗത്തിൽപ്പെട്ട വിദ്യാർത്ഥികൾക്ക് വിദ്യാഭ്യാസം ഉറപ്പുവരുത്തുന്നതിനായി സർക്കാർ നടപ്പിലാക്കിയ പദ്ധതിയാണ് ഏകലവ്യ മോഡൽ റെസിഡൻഷ്യൽ സ്കൂളുകൾ.
രാജ്യത്തെ മൂന്നര ലക്ഷത്തോളം വരുന്ന വനവാസി കുട്ടികൾക്ക് വിദ്യാഭ്യാസം പ്രദാനം ചെയ്യുന്ന 740ഓളം വരുന്ന ഏകലവ്യ സ്കൂളുകളിലേക്കാണ് 38,000 അദ്ധ്യാപകരെ നിയമിക്കുകയെന്നും ധനമന്ത്രി കേന്ദ്രബജറ്റ് പ്രസംഗത്തിനിടെ അറിയിച്ചു. കൂടാതെ ആരോഗ്യമേഖലയിലെ വിദ്യാഭ്യാസത്തിന് ഊന്നൽ നൽകുന്നതിന് വേണ്ടി 157 പുതിയ നഴ്സിംഗ് കോളേജുകൾ സ്ഥാപിക്കുമെന്നും ധനമന്ത്രി കൂട്ടിച്ചേർത്തു.
കുട്ടികൾക്കും കൗമാരക്കാരായ വിദ്യാർത്ഥികൾക്കും വേണ്ടി ദേശീയ ഡിജിറ്റൽ ലൈബ്രറി നടപ്പിലാക്കുന്നതാണ്. വിവിധ പഠന വിഷയങ്ങളുമായി ബന്ധപ്പെട്ട് കൂടുതൽ ഗുണനിലവാരമുള്ള പുസ്തകങ്ങൾ ഇതുവഴി വിദ്യാർത്ഥികൾക്ക് ലഭ്യമാകുമെന്നും ധനമന്ത്രി അറിയിച്ചു.
