പേര് പോലെ തന്നെ നിത്യവും വിളവ്! നിത്യവഴുതന എങ്ങനെ നട്ടു വളർത്താം? അറിയാം ഗുണങ്ങൾ

പേര് പോലെ തന്നെ നിത്യവും വിളവ് തരുന്ന പച്ചക്കറിയാണ് നിത്യവഴുതന. ഒരിക്കൽ നട്ടുവളർത്തിയാൽ ദീർഘകാലം വിളവ് തരുന്നതിനാലാണ് ‘നിത്യവഴുതന’ എന്ന് പേര് ലഭിച്ചത്. നാട്ടിൻപുറങ്ങളിൽ സമൃദ്ധമായി ലഭിക്കുന്ന പച്ചക്കറിയാണ് ഇത്. തോരൻ വെയ്‌ക്കാനും മെഴുക്കുപുരട്ടി ഉണ്ടാക്കാനും നിത്യവഴുതന വ്യാപകമായി ഉപയോഗിക്കുന്നു.

അധിക പരിചരണം ആവശ്യമില്ലാത്ത തന്നെ കനം കുറഞ്ഞ വള്ളികളിൽ പടർന്ന് വളരുന്ന തരം പച്ചക്കറിയാണിത്. വള്ളിയിൽ ചെറിയ മുള്ളുകൾ കാണാം. ഇവയുടെ വള്ളികളിൽ കൂട്ടമായുണ്ടാകുന്ന കായ്കൾ നീളൻ ഞെട്ടുപോലെ തോന്നും. ഇവയുടെ തലപ്പത്തുള്ള കായ് നീക്കി നീളത്തിലുള്ള ഭാഗമാണ് കറിയ്‌ക്കായി ഉപയോഗിക്കുന്നത്. ഇളം പ്രായത്തിൽ കുരുവും ഉപയോഗിക്കും.

എന്നും വിളവ് തരുന്നതുപോലെ നിത്യവഴുതന കഴിക്കുന്നതിലൂടെ നിത്യവും പോഷക ഗുണങ്ങളുമുണ്ട്. കായ്കളിൽ ഫൈബർ, വിറ്റാമിൻ സി, പൊട്ടാസ്യം, കാൽസ്യം തുടങ്ങിയവയാൽ സമൃദ്ധമാണ്. കാൽസ്യത്തിന്റെ കലവറ ആയതിനാൽ അസ്ഥിയുടെയും പല്ലുകളുടെയും ആരോഗ്യം മെച്ചപ്പെടുത്തും.

വിറ്റാമിൻ സി രോഗപ്രതിരോധം ഉറപ്പാക്കാൻ സഹായിക്കുന്നു. ശരീരത്തിലെ ചീത്ത കൊളസ്‌ട്രോളിന്റെ അളവ് കുറച്ച് നല്ല കൊളസ്‌ട്രോളിന്റെ നില ഉയർത്താനും നിത്യവഴുതനയ്‌ക്കാകും. നിത്യവും ഇത് ഭക്ഷണത്തിൽ ഉൾപ്പെടുത്തിയാൽ രക്തസമ്മർദ്ദം അകറ്റാമെന്ന് വിദഗ്ധർ പറയുന്നു. പ്രമേഹത്തെ തുരത്താനും നിത്യവഴുതന ശീലമാക്കാം. ദഹന പ്രക്രിയ മെച്ചപ്പെടുത്തി ദഹന സംബന്ധമായ പ്രശ്‌നങ്ങൾ പരിഹരിക്കാനും സഹായകമാണ് നിത്യവഴുതന.

എല്ലാ കാലത്തും കൃഷി ചെയ്യാവുന്ന നിത്യവഴുതനയ്‌ക്ക് കാര്യമായ പരിചരണം ആവശ്യമില്ലെങ്കിലും ജൈവവളങ്ങൾ നൽകിയാൽ സമൃദ്ധമായി കായ്‌ക്കും. വേനലിനെ അതിജീവിക്കാൻ ഇതിനാകും. നന്നായി കിളച്ചൊരുക്കിയ തടത്തിൽ വിത്തുകൾ നേരിട്ട് നടുകയാണ് വേണ്ടത്. സൂര്യപ്രകാശം ലഭിക്കുന്ന, പന്തലൊരുക്കാൻ സൗകര്യമുള്ള സ്ഥലത്ത് ജൈവവളങ്ങൾ ചേർത്ത് തടമൊരുക്കി വിത്തുകൾ നടാം. തടമൊരുക്കുമ്പോൾ ചാണകപ്പൊടിയും വേപ്പിൻ പിണ്ണാക്കും കൂടി അടിവളമായി ചേർക്കുന്നത് മികച്ച വിളവ് നൽകും. മട്ടുപ്പാവിലും ഗ്രോ ബാഗിലും നിത്യവഴുതന വളർത്താവുന്നതാണ്. നട്ടുവളർത്തുന്ന സ്ഥലങ്ങലിൽ വിത്തുകൾ വീണ് എല്ലാ കാലവും ഇവ നിലനിൽക്കുകയും ചെയ്യും.