പാലക്കാട്: മണ്ണാർക്കാട് തട്ടിക്കൊണ്ടുപോയ പേർഷ്യൻ പൂച്ചയെ തിരികെ ഏൽപ്പിച്ച് യുവതി. പൂച്ചയെ തട്ടിക്കൊണ്ടുപോകുന്നതിന്റെ സിസിടിവി ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിച്ചതിന് പിന്നാലെയാണ് തിരികെ ഏൽപ്പിച്ചത്. പൂച്ചയെ രഹസ്യമായാണ് മണ്ണാർക്കാട് പോലീസ് സ്റ്റേഷനിൽ ഏൽപ്പിച്ചത്. ഇതിന് പിന്നാലെ പൂച്ചയുടം ഉടമ പരാതി പിൻവലിച്ചു.
20,000 രൂപ വില മതിക്കുന്ന പൂച്ചയെ ജനുവരി 24-നാണ് മണ്ണാർക്കാട് ബസ് സ്റ്റാൻഡ് പരിസരത്ത് നിന്ന് യുവതി കടത്തിക്കൊണ്ടുപോയത്. പേർഷ്യൻ ഇനത്തിൽ പെട്ട പൂച്ചയെ ഡോക്ടറെ കാണിക്കാൻ കൊണ്ടുവന്നതായിരുന്നു. ഡോക്ടറെ കാണിച്ച ശേഷം ഉമ്മറിന്റെ കോഴിക്കടയിൽ ഇരിക്കുന്ന സമയത്താണ് പൂച്ച പുറത്തേക്കിറങ്ങിയത്. ഈ സമയം യുവതി പൂച്ചയെ പിടി കൂടുകയായിരുന്നു.
കോഴിക്കടയിലെ പൂച്ചയാണെന്ന് മറ്റ് കടക്കാർ പറഞ്ഞപ്പോൾ, അവിടെ കൊടുക്കാമെന്ന് പറഞ്ഞ് പൂച്ചയെയും കൊണ്ട് കടന്നു കളഞ്ഞു. കൊണ്ടുപോയവർ തിരിച്ചുതരുമെന്ന് കരുതി കാത്തിരുന്നുവെന്നും ഫലമില്ലെന്ന് മനസിലായപ്പോഴാണ് മണ്ണാർക്കാട് സ്റ്റേഷനിൽ പരാതി നൽകിയതെന്ന് ഉമ്മർ പറയുന്നു. യുവതിയുടെ സഹോദരനാണ് പൂച്ചയെ എത്തിച്ചത്. ഇയാൾ തിരികെ പോയതോടെ പോലീസ് ഉടമയെ വിളിച്ചുവരുത്തി പൂച്ചയെ ഏൽപ്പിക്കുകയായിരുന്നു,
