ന്യൂഡൽഹി: ഇന്ത്യൻ ഊർജ്ജ വാരാചരണത്തിന്റെ ഭാഗമായി യു എ ഇ, മലേഷ്യ എന്നീ രാജ്യങ്ങളിലെ സാമ്പത്തിക-വ്യവസായ, നൂതന സാങ്കേതിക മന്ത്രിമാരുമായി കൂടിക്കാഴ്ച നടത്തി കേന്ദ്ര മന്ത്രി ഹർദീപ് സിംഗ് പുരി. യുഎഇ വ്യവസായ-നൂതന-സാങ്കേതിക മന്ത്രി ഡോ.സുൽത്താൻ അഹമ്മദ് അൽ ജാബർ, മലേഷ്യൻ സാമ്പത്തിക മന്ത്രി ഹജ്ജ ഹനീഫ ഹജർ തായിബ് എന്നിവരുമായിട്ടാണ് ഹർദീപ് സിംഗ് പുരി ഉഭയകക്ഷി ചർച്ച നടത്തിയത്. ബെംഗളൂരുവിൽ നടന്ന ചർച്ചയുടെ വിശദാംശങ്ങൾ അദ്ദേഹം ട്വിറ്ററിലൂടെ പുറത്തുവിട്ടു.
‘വളർച്ച. സഹകരണം. പരിവർത്തനം! നിരവധി രാജ്യങ്ങളിൽ നിന്നുള്ള സഹ ഊർജ്ജ മന്ത്രിമാർ, മുതിർന്ന ഉദ്യോഗസ്ഥർ, നയതന്ത്രജ്ഞർ എന്നിവർക്കൊപ്പം’ എന്ന തലക്കെട്ടോടെയാണ് ട്വീറ്റ് ചെയ്തത്. കൂടിക്കാഴ്ചയിൽ ഉഭയകക്ഷി ഊർജ്ജ ബന്ധങ്ങളെക്കുറിച്ച് ചർച്ച ചെയ്തു.
ഇന്ത്യ അദ്ധ്യക്ഷം വഹിക്കുന്ന ജി-20 ‘ഇന്ത്യൻ ഊർജ്ജ വാരാചരണം’ പ്രധാനമന്ത്രി നരേന്ദ്രമോദിയാണ് ഉദ്ഘാടനം ചെയ്തത്. ഫെബ്രുവരി 6 മുതൽ 8 വരെയാണ് ഊർജ്ജ വാരാചരണം സംഘടിപ്പിച്ചിരിക്കുന്നത്. ഊർജ്ജ മേഖലയിൽ ഇന്ത്യയുടെ മുന്നേറ്റം ലോക രാജ്യങ്ങൾക്ക് മുന്നിൽ പ്രദർശിപ്പിക്കാനാണ് ഊർജ്ജ വാരാചരണം കൊണ്ട് ഇന്ത്യ ലക്ഷ്യമിടുന്നത്.
Comments