രാജ്യം വിനോദസഞ്ചാര മേഖലയിൽ മുന്നേറിക്കൊണ്ടിരിക്കുകയാണ്. തീർത്ഥാടകർക്കും വിനോദസഞ്ചാരികൾക്കും ഒരുപോലെ പ്രിയപ്പെട്ടയിടമാണ് വാരണാസി. ഇപ്പോഴിതാ ഇന്ത്യയിലെ ജനങ്ങളുടെ പ്രിയപ്പെട്ട വിവാഹ കേന്ദ്രമായി മാറിയിരിക്കുകയാണ് വാരണാസി ടെന്റ് സിറ്റി. ഈ വർഷത്തെ വിവാഹങ്ങൾക്കുള്ള ബുക്കിംഗ് ആരംഭിച്ചു കഴിഞ്ഞു എന്നാണ് ടെന്റ് സിറ്റിയുടെ ഓപ്പറേഷൻ ഹെഡ് അഭിഷേക് ഭട്ടാചാര്യ പറഞ്ഞു. മാർച്ച് ആദ്യവാരം ആദ്യ ബുക്കിംഗ് പൂർത്തിയായി എന്നും അദ്ദേഹം കൂട്ടിച്ചേർത്തു. ആരവങ്ങളിൽ നിന്നും അകന്ന് ആത്മീയതയുള്ള ഗംഗാതീരത്താണ് ഈ വിവാഹങ്ങൾ നടക്കുക എന്ന പ്രത്യേകതയാണ് ആളുകളെ ഇവിടം പ്രിയപ്പെട്ടതാക്കുന്നത്.
വിനോദസഞ്ചാരികൾക്കായി പത്ത് ഹെക്ടറിലായി ഇരുനൂറിലധികം ടെന്റുകളാണ് ഉത്തർപ്രദേശ് സർക്കാർ ഒരുക്കിയിട്ടുള്ളത്. സിറ്റിഘട്ടിന് സമീപമാണ് വാരണാസി ടെന്റ് സിറ്റി ആവിഷ്കരിച്ചിരിക്കുന്നത്. സഞ്ചാരികൾക്ക് സൂര്യോദയം, രാവിലെ തത്സമയ സംഗീതപരിപാടികൾ, യോഗപരിശീലനം, ബോട്ടുയാത്രകൾ എന്നിവ ആസ്വദിക്കാം. സ്വിസ് കോട്ടേജുകൾ, റിസപ്ഷൻ, ഗെയിമിങ് സോൺ, റെസ്റ്റോറന്റുകൾ, ഡൈനിങ് ഏരിയ, കോൺഫറൻസ് വേദികൾ, സ്പാ, യോഗ സെന്ററുകൾ, ലൈബ്രറി, ആർട്ട് ഗാലറി എന്നിവയടങ്ങിയതാണ് ടെന്റ് സിറ്റി എന്ന് വാരണാസി വികസന അതോറിറ്റി അറിയിച്ചു.
ഇക്കഴിഞ്ഞ ജനുവരി 13-നാണ് വാരണാസി ഗംഗാ നദിതീരത്ത് ടെന്റ് സിറ്റിയ്ക്ക് പ്രധാനമന്ത്രി നരേന്ദ്രമോദി ഉദ്ഘാടനം ചെയ്തത്. പ്രദേശത്തെ ടൂറിസം മേഖലയെ ഉത്തേജിപ്പിക്കുന്നതിനാണ് ഇത്തരത്തിലൊരു പദ്ധതി ആവിഷ്കരിക്കുന്നതെന്ന് ഉദ്ഘാടന വേളയിൽ അദ്ദേഹം വ്യക്തമാക്കിയിരുന്നു. കേന്ദ്ര തുറമുഖ, ഷിപ്പിംഗ്,ജലഗതാഗത മന്ത്രി സർബാനന്ദ സോനോവാൾ, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് എന്നിവർ അന്ന് ചടങ്ങിൽ സന്നിഹിതരായിരുന്നു.
Comments