ജയ്പൂർ : ഇന്ത്യയുടെ ‘അമൂല്യമായ പാരമ്പര്യ’ത്തിന്റെ പ്രാധാന്യം യുവാക്കൾ മനസ്സിലാക്കണമെന്ന് രാഷ്ട്രപതി ദ്രൗപദി മുർമു. രാജസ്ഥാനിലെ ബിക്കാനീറിൽ നടന്ന 14-ാമത് രാഷ്ട്രീയ സംസ്കൃതി മഹോത്സവത്തിൽ നടന്ന സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു രാഷ്ട്രപതി. ഇന്ത്യയുടെ ‘അമൂല്യമായ പാരമ്പര്യ’ത്തിന്റെ പ്രാധാന്യം യുവജനങ്ങൾ മനസ്സിലാക്കേണ്ടത് ആവശ്യമാണ്. അടിസ്ഥാന മൂല്യങ്ങളും തത്വങ്ങളും ഒരു തലമുറയിൽ നിന്ന് മറ്റൊരു തലമുറയിലേക്ക് കൈമാറണമെന്ന് മുർമു പറഞ്ഞു.
‘രാജ്യത്തിന്റെ സമ്പന്നമായ സംസ്കാരത്തിൽ നാം അഭിമാനിക്കണം. രാജ്യത്തെ യുവാക്കളും കുട്ടികളും രാജ്യത്തിന്റെ അമൂല്യമായ പാരമ്പര്യത്തിന്റെ പ്രാധാന്യം മനസ്സിലാക്കണം. ഗ്രാമങ്ങളിലെ കലാകരന്മാരെയും കരകൗശല വിദഗ്ധരെയും തിരിച്ചറിയേണ്ടതും അംഗികരിക്കേണ്ടതും നമ്മുടെ കർത്തവ്യമാണ്’ രാഷ്ട്രപതി ചൂണ്ടിക്കാട്ടി.
കേന്ദ്ര സാംസ്കാരിക മന്ത്രാലയത്തിന്റെ ആഭിമുഖ്യത്തിൽ ഫെബ്രുവരി 25 മുതൽ മാർച്ച് 5 വരെയാണ് രാഷ്ട്രീയ സംസ്കൃതി മഹോത്സവം സംഘടിപ്പിച്ചിരിക്കുന്നത്. ഒമ്പത് ദിവസം നീണ്ടുനിൽക്കുന്ന സാംസ്കാരിക ഘോഷയാത്രയിൽ ഇന്ത്യയുടെ വിവിധ ഭാഗങ്ങളിൽ നിന്നുള്ള കലാകാരന്മാർ പങ്കെടുക്കും.
