പുരാതന ചരിത്രത്തിന്റെ നേർക്കാഴ്ചയാണ് മറയൂരിലെ വീരക്കല്ല്. മറയൂർ അഞ്ചുനാട് ഗ്രാമത്തിന്റെ കവാടമായ തലൈവാസലിന്റെ മുൻ വശത്തുള്ള ആൽമരത്തിന്റെ ചുവട്ടിലാണ് വീരക്കല്ല് ചരിത്രശേഷിപ്പായി നിൽക്കുന്നത്. 11-ാം നൂറ്റാണ്ട് മുതൽ 13-ാം നൂറ്റാണ്ടുവരെയുള്ള ചരിത്രമാണ് വീരക്കല്ലിൽ നിന്ന് മനസിലാക്കാൻ കഴിയുന്നത്. ര്ണ്ടരയടി ഉയരത്തിലും അരയടി വീതിയിലുമാണ് വീരക്കല്ല് മറയൂകിൽ സ്ഥിതി ചെയ്യുന്നത്.
നവീന ശിലായുഗത്തിന്റെ അവസാനഘട്ടത്തിൽ ജീവിച്ചിരുന്ന വീരപുരുഷന്മാരുടെയും ധീര സ്തീ ജനങ്ങളുടെയും ചരിത്രമാണ് വീരക്കല്ലിൽ രേഖപ്പെടുത്തിയിരിക്കുന്നത്. അവർ ജീവിച്ചിരുന്ന വംശത്തിലെ രാജാക്കൻമാർ, സൈനിക തലവന്മാർ തുടങ്ങിയവർ മരണപ്പെടുമ്പോഴോ കൊല്ലപ്പെടുമ്പോഴോ ആണ് വീരക്കല്ല് ജനവാസ കേന്ദ്രത്തിലെ ആരാധന ഭാഗത്തോ ഉയർന്ന ഭൂപ്രദേശങ്ങളിലോ സ്ഥാപിക്കുന്നത്. ഒമ്പതാം നൂറ്റാണ്ട് മുതൽ 15-ാം നൂറ്റാണ്ട് വരെയുള്ള കാലഘട്ടത്തിലാണ് വീരക്കല്ല് ഉപയോഗിച്ചുവന്നിരുന്നതെന്ന് പറയപ്പെടുന്നു.
വ്യക്തികളുടെ രൂപങ്ങളോട് കൂടിയ വീരക്കല്ലും ചരിത്രമെഴുതിയ വീരക്കല്ലുമുണ്ട്. മറയൂർ വീരക്കല്ലിൽ പ്രാചീന തമിഴാണ് എഴുതിയിരിക്കുന്നത്. മുൻ ട്രാവൻകൂർ എത്തിയോഗ്രഫി മേധാവി വസുദേവ വാര്യരാണ് മറയൂർ വീരക്കല്ല് പഠനവിധേയമാക്കിയത്. കേരളത്തിന് പുറമേ കർണാടകയിലും തമിഴ്നാട്ടിലെ ഉസലംപെട്ടി ഭാഗങ്ങളിലും വീരക്കല്ല് കണ്ടെത്തിയിട്ടുണ്ട്. മറയൂർ താഴ്വരയിലെ വിവിധ ആരാധന കേന്ദ്രങ്ങളിൽ സ്ത്രീകളുടെ ചിത്രങ്ങൾ കൊത്തിയെടുത്ത വീരക്കല്ലുകൾ ഇപ്പോഴും നിലനിൽക്കുന്നു. നാച്ചിയമ്മൻ എന്ന പേരിലാണ് ഇവ അറിയപ്പെടുന്നത്. നാച്ചിവയൽ എന്ന പേരിൽ ഒരു മേഖല തന്നെ മറയൂരിലുണ്ട്.
