തിരുവനന്തപുരം: ടെലിവിഷൻ കോമഡി രംഗത്തെ ജനപ്രിയ താരമാണ് ഉല്ലാസ് പന്തളം. എന്നാൽ അപ്രതീക്ഷിതമായാണ് ഉല്ലാസിന്റെ ജീവിതത്തിൽ ഒരു ദുരന്തം നടന്നത്. കഴിഞ്ഞ ഡിസംബർ 20 നാണ് ഉല്ലാസിന്റെ ഭാര്യ ആശയെ വീട്ടിൽ മരിച്ച നിലയിൽ കണ്ടെത്തിയത്. ഭാര്യയുടെ മരണത്തിന് ശേഷം ആകെ തകർന്ന ഉല്ലാസ് വീണ്ടും കോമഡി രംഗത്ത് സജീവമാകുകയാണ്.
ജോലിയില്ലാതെ മുന്നോട്ട് പോകാൻ പറ്റാത്ത സാഹചര്യമായത് കൊണ്ടാണ് വീണ്ടും തിരിച്ചുവന്നതെന്ന് ഉല്ലാസ് പറഞ്ഞു. മക്കളെ നോക്കണം അതാണ് വീണ്ടും ഇതേ ജോലിയിലേക്ക് വരാൻ കാരണമെന്നും ഉല്ലാസ് കൂട്ടിച്ചേർത്തു. സാഹചര്യം ഇങ്ങനെയായത് കൊണ്ടാണ് വിഷമിച്ചിരിക്കുമ്പോഴും കോമഡി വേഷങ്ങൾ ചെയ്യുന്നത്. ജോലി ചെയ്യാതെ ജീവിക്കാൻ സാധിക്കില്ലല്ലോ എന്നുമാണ് ഉല്ലാസ് പറയുന്നത്.
നമ്മുടെ സാഹചര്യം അതായി പോയില്ലേ. എല്ലാം നിർത്തി വീട്ടിൽ ഇരിക്കാൻ പറ്റാത്തവർ പണിക്ക് പോയെ പറ്റൂ. പിന്നെ മക്കളുണ്ട് അവരെയൊക്കെ വളർത്തണം നമ്മുടെ ജോലി തുടർന്ന് കൊണ്ട് പോയില്ലെങ്കിൽ പിന്നീട് എല്ലാം നഷ്ടപ്പെട്ട് പോകും. അതുകൊണ്ടാണ് വീണ്ടും ഇറങ്ങി തിരിച്ചത്. ഞാൻ മാത്രം അല്ല എല്ലാവരും അങ്ങനെ തന്നെ ആയിരിക്കുമെന്ന് ഉല്ലാസ് കൂട്ടിച്ചേർത്തു.
തിരിച്ചുവരവിന് സുഹൃത്തുക്കൾ വലിയ പിന്തുണ നൽകിയിരുന്നു. ഇനി മുന്നോട്ട് ജീവിക്കാൻ പരിപാടികൾ ചെയ്യണം. വീണ്ടും കലാരംഗത്ത് സജീവം ആകണമെന്നും ഉല്ലാസ് പറഞ്ഞു.
ഭാര്യയുടെ മരണശേഷം ഉല്ലാസ് ആദ്യമായി ചെയ്ത സ്റ്റേജ് ഷോ മസ്ക്കറ്റിലാണ്. ഒരുപാട് മാനസിക സമ്മർദ്ദത്തിൽ നിന്നാണ് ആ ഷോ താൻ ചെയ്തതെന്നും ഉല്ലാസ് പറഞ്ഞു. എന്നാൽ പെർഫോം ചെയ്യുമ്പോൾ എല്ലാം മറക്കണമെന്നും ഉല്ലാസ് പറയുന്നു. ഇന്നത്തെ കാലത്ത് കലാകാരന്മാർക്ക് ഒന്നിനും ഒരു അഭിപ്രായവും പറയാൻ പറ്റാത്ത സാഹചര്യമാണെന്നും ഉല്ലാസ് വ്യക്തമാക്കി.
Comments