സ്വന്തമായ ഒരു വീട് സ്വപ്നം കാണുന്നവരുടെ പ്രധാന ആശങ്കയാണ് വീടു പണിയ്ക്ക് ഇഷ്ടികയാണോ സിമന്റ്കട്ടയാണോ നല്ലത് എന്ന്. ഇക്കാര്യത്തിൽ പലർക്കും ആശയക്കുഴപ്പമാണ്. പണ്ടുകാലത്തൊക്കെ വീട് നിർമ്മിക്കാൻ പ്രധാനമായും ഉപയോഗിച്ചിരുന്നത് കളിമണ്ണിൽ നിർമ്മിച്ച് ചൂളയിൽ ചുട്ടെടുത്ത ഇഷ്ടിക തന്നെയായിരുന്നു. ഈ ഇഷ്ടിക കൊണ്ട് നിർമ്മിക്കുന്ന വീടുകൾക്ക് നല്ല ഈടും ഉറപ്പുമാണ്. എന്നാൽ, അക്കാലത്ത് ലഭിച്ചിരുന്ന പോലത്തെ ഇഷ്ടിക ഇന്ന് എളുപ്പത്തിൽ ലഭിക്കുന്നില്ല എന്നതു തന്നെയാണ് പലരുടെയും പ്രശ്നം. ഈ ആവസരത്തിലാണ് പലരും ഹോളോബ്രിക്സ് അഥവാ സിമന്റ് കട്ടകളെ ആശ്രയിക്കുന്നത്.
വീടു നിർമിക്കാൻ ഉപയോഗിക്കുന്നത് സിമന്റ്കട്ടയോ ഇഷ്ടികയോ മറ്റെന്തെങ്കിലും ബ്ലോക്കോ ആയാലും കംപ്രസീവ് സ്ട്രെംഗ്ത് ഉണ്ടാവുക എന്നതാണ് പ്രധാനം. ഒരു ബ്ലോക്ക് മെക്കാനിക്കൽ റാം ഉപയോഗിച്ച് അമർത്തുമ്പോൾ ബ്ലോക്ക് ബ്രേക്ക് ആകുന്ന സമയത്ത് അതിന്റെ ഒരു യൂണിറ്റ് ഏരിയയിലുള്ള ലോഡ് ആണ് കംപ്രസീവ് സ്ട്രെംഗ്ത്. സിമന്റ് ബ്ലോക്ക് ആണെങ്കിലും ഇഷ്ടിക ആണെങ്കിലും ആവശ്യത്തിന് കംപ്രസീവ് സ്ട്രെംഗ്തില്ല എങ്കിൽ കെട്ടിടങ്ങൾ നിർമ്മിക്കുന്നതിനു കൊള്ളില്ല. അതിനാൽ കംപ്രസീവ് സ്ട്രെംഗ്ത് പരിശോധിച്ച് അറിയുകയാണ് ആദ്യം വേണ്ടത്.
സിമന്റ് ബ്ലോക്ക് അല്ലെങ്കിൽ ഇഷ്ടിക നിർമിക്കാനുപയോഗിക്കുന്ന സാമഗ്രികളുടെയും നിർമാണരീതികളുടെയും ഗുണം അനുസരിച്ചായിരിക്കും അതിന്റെ ഉറപ്പ്. അതിനാൽ ഒന്നിനെക്കാൾ മികച്ചതാണ് മറ്റേത് എന്നു പറയാൻ സാധിക്കില്ല. നാം വാങ്ങാനുദ്ദേശിക്കുന്ന ബ്ലോക്ക് ഏതായാലും സാംപിളുകൾ വാങ്ങി കംപ്രസീവ് സ്ട്രെംഗ്ത് ഉണ്ടോ എന്ന് ഒരു സിവിൽ എൻജിനീയറുടെ സഹായത്തോടെ പരിശോധിക്കുകയാണ് ചെയ്യേണ്ടത്.
