കൊച്ചി: കളമശ്ശേരിയിൽ യുവതിയെ രണ്ട് ദിവസം തടങ്കലിൽ വച്ച് കൂട്ടബലാത്സംഗത്തിനിരയാക്കിയ സംഭവത്തിൽ പ്രതികൾ നടത്തിയത് വൻ ആസൂത്രണമെന്ന് പൊലീസ്. പങ്കാളി ടാക്സി ഓടിക്കാൻ പോയെന്ന് ഉറപ്പാക്കിയ ശേഷമാണ് അതിജീവിതയെ പ്രതികൾ വാഹനമയച്ച് സ്പായിലേക്ക് വിളിപ്പിച്ചതെന്ന് അന്വേഷണത്തിൽ വ്യക്തമായി. പീഡനത്തിന് ശേഷം തിരികെ പോകുന്നതിനായി യുവതിക്ക് പുതിയ വസ്ത്രങ്ങളും വാങ്ങി നൽകിയതായി പൊലീസ് കണ്ടെത്തി.
പ്രതികളിലൊരാളായ സ്ത്രീയാണ് തന്നെ കൂടുതൽ ഉപദ്രവിച്ചതെന്നാണ് അതിജീവിതയുടെ പ്രാഥമിക മൊഴി. മദ്യവും രാസലഹരിയും നൽകിയ ശേഷമാണ് പീഡിപ്പിച്ചതെന്നും യുവതി മൊഴി നൽകിയതായി പൊലീസ് അറിയിച്ചു. കേസിലെ രണ്ടാം പ്രതിയായ യുവതിയും നാലാം പ്രതിയും ഇപ്പോഴും ഒളിവിലാണ്. ഇവർക്കായി അന്വേഷണം ഊർജിതമാക്കിയിട്ടുണ്ട്.
സ്പായിൽ മാനേജർ ജോലി ഒഴിവുണ്ടെന്ന വ്യാജേന ഒഎൽഎക്സിൽ നൽകിയ പരസ്യം കണ്ടാണ് യുവതി പ്രതികളെ സമീപിച്ചത്. ഈ മാസം രണ്ടിന് അഭിമുഖത്തിനായി വിളിച്ചുവരുത്തിയ ശേഷം യുവതിയെ തടങ്കലിലാക്കുകയായിരുന്നു. മദ്യവും ലഹരിമരുന്നും നൽകിയതിന് പിന്നാലെ രണ്ട് ദിവസത്തോളം യുവതിയെ തടഞ്ഞുവച്ച് പീഡിപ്പിച്ചെന്നാണ് പൊലീസ് കണ്ടെത്തൽ.
സംഭവവുമായി ബന്ധപ്പെട്ട് ഇരിക്കാവ് സ്വദേശി ശ്രീരാജ് (30), തേവയ്‌ക്കൽ സ്വദേശി ജിത്ത് മാർട്ടിൻ (27) എന്നിവരെ കളമശേരി പൊലീസ് അറസ്റ്റ് ചെയ്തിട്ടുണ്ട്. കേസിൽ ആകെ നാല് പേർ ഉൾപ്പെട്ടിട്ടുണ്ടെന്നാണ് പൊലീസ് പറയുന്നത്. പ്രതികളിലൊരാൾ കൊച്ചിയിലെ നാല് സ്പാകളുടെ നടത്തിപ്പുകാരനാണെന്നും കണ്ടെത്തിയിട്ടുണ്ട്.
അതിജീവിതയെ അഭിമുഖത്തിനായി വിളിച്ചുവരുത്തിയ പത്തടിപ്പാലത്തെ സ്പായിൽ പൊലീസ് പരിശോധന നടത്തി സിസിടിവി ദൃശ്യങ്ങൾ ശേഖരിച്ചു. പീഡനത്തിന്റെ ദൃശ്യങ്ങൾ പ്രതികൾ പകർത്തിയിട്ടുണ്ടോയെന്നും പൊലീസ് പരിശോധിക്കുന്നുണ്ട്. സ്‌പായുടെ മറവിൽ സമാനമായ സംഭവങ്ങൾ നേരത്തെയും നടന്നിട്ടുണ്ടോയെന്നതടക്കമുള്ള കാര്യങ്ങളും അന്വേഷണപരിധിയിലാണ്.
