കൊച്ചി: കമ്മ്യൂണിസ്റ്റ് പാർട്ടിക്കെതിരെ രൂക്ഷ വിമർശനവുമായി മുതിർന്ന സിപിഎം നേതാവ് എം.എം ലോറൻസ്. പാർട്ടിയുടെ സ്വഭാവത്തിൽ മാറ്റങ്ങൾ സംഭവിച്ചു. അധികാരത്തിനും സ്ഥാനമാനങ്ങൾക്കുമായി മത്സരിക്കുന്ന അവസ്ഥയാണ് ഇന്ന് പാർട്ടിയിലുള്ളതെന്നും അദ്ദേഹം കുറ്റപ്പെടുത്തി.
എന്റെ സ്ഥാനക്കയറ്റം, എന്റെ ഉന്നതി, എന്നെപോലെ മറ്റൊരാളും ഉണ്ടാകരുത് എന്ന ചിന്ത പാർട്ടിയിൽ വളരുകയാണ്. ഇങ്ങനെ ചിന്തിക്കുന്നവർ സ്വയം പരാജയമടയും. മതം മനുഷ്യനെ മയക്കുന്ന കറുപ്പാണെന്ന് പറഞ്ഞ കാറൽ മാർക്സിന്റെ വാക്കുകൾ ഇപ്പോഴത്തെ സാഹചര്യത്തിൽ ഏറെ പ്രസക്തമാണ്. പാർട്ടിയിലുണ്ടാകുന്ന മാറ്റങ്ങൾ ജീവിക്കുന്നവർക്ക് ഗുണം ചെയ്യണമെന്നും എം എം ലോറൻസ് പറഞ്ഞു.
ആലുവയിൽ ഐഎസ്ആർഒ സ്റ്റാഫ് അസോസിയേഷന്റെ സുവർണ്ണ ജൂബിലി ആഘോഷങ്ങളുടെ ഭാഗമായി സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം.
