ന്യൂഡല്ഹി: നേപ്പാളില് വന് നാശം വിതച്ച മിന്നല്പ്രളയത്തിന്റെ പശ്ചാത്തലത്തില് പ്രധാനമന്ത്രി നരേന്ദ്ര മോദി നേപ്പാള് പ്രധാനമന്ത്രി ബാലേന്ദ്ര ഷായുമായി ഫോണില് സംസാരിച്ചു. പ്രളയത്തില് ജീവന് നഷ്ടപ്പെട്ടവരുടെ കുടുംബങ്ങളെ അനുശോചനം അറിയിച്ച മോദി, പ്രതിസന്ധി നേരിടാന് ഇന്ത്യയുടെ എല്ലാ മാനുഷിക സഹായവും വാഗ്ദാനം ചെയ്തു. നേപ്പാളിലെ റസുവ മേഖലയില് ഉണ്ടായ ശക്തമായ പ്രളയത്തില് ഇതുവരെ 46 പേര് മരിച്ചതായാണ് റിപ്പോര്ട്ട്. 400ഓളം പേരെ കാണാതായതായും റിപ്പോര്ട്ടുകളുണ്ട്. നദീതീരത്തെ നിരവധി ഗ്രാമങ്ങളിലും അടിസ്ഥാന സൗകര്യങ്ങളിലും കനത്ത നാശനഷ്ടമുണ്ടായി. ഒരു ഡസനോളം ജലവൈദ്യുത പദ്ധതികളെയും പ്രളയം ബാധിച്ചിട്ടുണ്ട്.
പ്രതിസന്ധി ഘട്ടത്തില് നേപ്പാള് ജനതയ്ക്കൊപ്പം ഇന്ത്യ ഉറച്ചുനില്ക്കുമെന്ന് പ്രധാനമന്ത്രി മോദി വ്യക്തമാക്കി. രക്ഷാപ്രവര്ത്തനത്തിനും ദുരിതാശ്വാസ പ്രവര്ത്തനങ്ങള്ക്കുമായി ഇന്ത്യന് സംഘങ്ങള് നേപ്പാള് അധികൃതരുമായി അടുത്ത് ഏകോപിച്ച് പ്രവര്ത്തിക്കുന്നുണ്ടെന്നും അദ്ദേഹം അറിയിച്ചു. പ്രളയബാധിത നേപ്പാളിലേക്ക് ഇന്ത്യന് വ്യോമസേനാ വിമാനങ്ങളില് അടിയന്തര ദുരിതാശ്വാസ സാമഗ്രികള് അയയ്ക്കാനുള്ള നടപടികളും ഇന്ത്യ ആരംഭിച്ചിട്ടുണ്ട്. മരുന്നുകള്, ഭക്ഷ്യവസ്തുക്കള്, മറ്റ് അവശ്യസാധനങ്ങള് എന്നിവ ഉള്പ്പെടുന്ന സഹായമാണ് അയയ്ക്കുന്നത്.
രക്ഷാപ്രവര്ത്തനങ്ങള്ക്ക് സഹായം നല്കുന്നതിനായി ദേശീയ ദുരന്ത നിവാരണ സേനയായ എന്.ഡി.ആര്.എഫ് സംഘങ്ങളെ നേപ്പാളിലേക്ക് അയയ്ക്കുന്നതും കേന്ദ്രസര്ക്കാര് പരിഗണിക്കുന്നുണ്ട്.
