ബ്രഹ്മപുരം മാലിന്യപ്ലാന്റിലെ തീ പൂർണമായി അണച്ചെങ്കിലും പുകപടലങ്ങൾ ഇപ്പോഴും അന്തരീക്ഷത്തിൽ തങ്ങി നിൽക്കുന്നുവെന്ന് നടി സജിത മഠത്തിൽ. പുക ഒഴിഞ്ഞുപോയി എന്നാണ് താൻ മാദ്ധ്യമങ്ങളിൽ നിന്ന് മനസ്സിലാക്കിയതെന്നും ഇപ്പോൾ ഫ്ലാറ്റിന്റെ പുറത്തേക്ക് നോക്കിയാൽ കാണുന്നത് ബ്രഹ്മപുരത്തു നിന്നുള്ള പുകയാണോ എന്നും സജിത ചോദിക്കുന്നു. ഫെയ്സ്ബുക്ക് പോസ്റ്റിലൂടെയാണ് സജിതയുടെ ചോദ്യം. കൊച്ചിയിലെ തന്റെ ഫ്ലാറ്റിൽ നിന്നും എടുത്ത ആകാശത്തിന്റെ ഫോട്ടോയും നടി പങ്കുവെച്ചിട്ടുണ്ട്.
‘ഇങ്ങിനെയാണ് ഫ്ലാറ്റിന്റെ പുറത്തേക്ക് നോക്കുമ്പോൾ കാണുന്നത്. ഇത് ബ്രഹ്മപുരത്തു നിന്നുള്ള പുകയാണോ? അവിടെ തീ കെടുത്തി, പുക ഒഴിഞ്ഞു എന്നാണ് മാദ്ധ്യമങ്ങളിൽ നിന്ന് മനസ്സിലായത്. പിന്നെ ഇതെന്തു പ്രതിഭാസമാകും ? വിവരമുള്ളവർ പറഞ്ഞു തരണേ. ജനലും വാതിലുമൊക്കെ തുറന്നു കിടക്കുകയാണ് ! ‘- എന്നാണ് സജിത മഠത്തിൽ ഫേസ്ബുക്കിൽ കുറിച്ചത്.
നേരത്തെയും താരം പ്രതികരിച്ച് രംഗത്തുവന്നിട്ടുണ്ട്. ഫ്ലാറ്റിനകം മുഴുവൻ പുകമണമാണെന്നും ചുറ്റം കാണാൻ സാധിക്കാത്ത സാചര്യത്തിലാണെന്നും സജിത മഠത്തിൽ പറഞ്ഞിരുന്നു.’ഫ്ലാറ്റിനകം മുഴുവൻ പുകമണമാണ്. ഇന്നലെ രാത്രി ചുറ്റും കാണാത്ത രീതിയിൽ പുക നിറഞ്ഞിരുന്നു. ഇന്നു രാവിലെ കാറ്റിന്റെ ഗതി കൊണ്ടാവും പുറത്ത് അല്പം തെളിച്ചമുണ്ട്. ഇതിനൊന്നും ഒരു ശാശ്വത പരിഹാരവുമില്ലെ ഈ പരിഷ്കൃത, സാസ്കാരിക കേരളത്തിൽ?’ എന്നാണ് നടി അന്ന് ഫെയ്സ്ബുക്കിൽ പങ്കുവെച്ച കുറിപ്പ്.
