വാഴ, വാഴയ്ക്ക, വാഴയില…വാഴപ്പിണ്ടി… അതെ വാഴ പോഷക സമൃദ്ധമാണ്. വാഴപ്പഴം കഴിച്ച് മാത്രം ശീലമുള്ളവർക്ക് ഒരുപക്ഷേ ഇതിന്റെ ഗുണങ്ങൾ അറിയണമെന്നില്ല. രക്തസമ്മർദ്ദം അകറ്റാനും ഹൃദ്രോഗത്തെ ചെറുക്കാനും ദഹന പ്രക്രിയ സുഗമമാക്കാനും മികച്ചതാണ് വാഴപ്പിണ്ടി. ഇനി ശരീരത്തിലെ കൊഴുപ്പ് അകറ്റാൻ ആഗ്രഹിക്കുന്നവർക്കും ബെസ്റ്റ് ഓപ്ഷനാണ് വാഴപ്പിണ്ടി.
ഇനി ഈ വാഴപ്പിണ്ടി എങ്ങനെ ഉപയോഗിക്കാമെന്നണോ സംശയം? വാഴപ്പിണ്ടി ജ്യൂസ് ആയും തോരനായോ കറിയായോ കഴിക്കാവുന്നതാണ്. ചില വാഴപ്പിണ്ടി വിഭവങ്ങൾ പരിചയപ്പെടാം..
1) വാഴപ്പിണ്ടി തോരൻ
ആവശ്യമായ ചേരുവകൾ:
വാഴപ്പിണ്ടി- ചെറുതായി അരിഞ്ഞത് ഒരു കപ്പ്
തേങ്ങ- കാൽ കപ്പ്
പച്ചമുളക് – 2 എണ്ണം
ജീരകം- കാൽ സ്പൂൺ
കറിവേപ്പില-ആവശ്യത്തിന്
മഞ്ഞൾപൊടി -കാൽ സ്പൂൺ
എണ്ണ – 3 സ്പൂൺ
ചുവന്ന മുളക് – 3 എണ്ണം
കടുക്- ഒരു സ്പൂൺ
കറിവേപ്പില -ഒരു തണ്ട്
തയ്യാറാക്കുന്ന വിധം:
ചൂടായ ചട്ടിയിൽ എണ്ണ ഒഴിക്കുക. അതിലേക്ക് കടുക്, ചുവന്ന മുളക് , കറിവേപ്പില എന്നിവയും ചെറുതായി അരിഞ്ഞ് വെച്ചിരിക്കുന്ന വാഴപ്പിണ്ടി ചേർക്കുക. ആവശ്യത്തിന് ഉപ്പും ചേർത്ത് രണ്ട് മിനിട്ട് അടച്ചു വയ്ക്കുക. തേങ്ങ, പച്ചമുളക്, ജീരകം , മഞ്ഞൾ പൊടി എന്നിവ ചതച്ചു എടുക്കുക. ചീനച്ചട്ടിയിലേക്ക് ചതച്ച് വെച്ചിരിക്കുന്ന കൂട്ട് രണ്ടു ടീസ്പൂൺ വെള്ളവും ഒഴിച്ച് നന്നായി ഇളക്കി യോജിപ്പിക്കുക. വെന്ത് കഴിയുമ്പോൾ തീ ഓഫ് ചെയ്യുക. ചോറിനൊപ്പം കഴിക്കാൻ പറ്റിയ വളരെ ഹെൽത്തിയായ ഒരു തോരൻ ആണ് വാഴപ്പിണ്ടി തോരൻ.
2) വാഴപ്പിണ്ടി ജ്യൂസ്
വാഴപ്പിണ്ടിയുടെ ഗുണങ്ങൾ ധാരാളമുള്ള സംഭാരമാണ് ഇത്. വേനൽ ചൂടിനെ അകറ്റാനും ക്ഷീണം മാറാനും അത്യുത്തമമാണ് വാഴപ്പിണ്ടി ജ്യൂസ്. എങ്ങനെ തയ്യാറാക്കാമെന്ന് നോക്കാം.
ആവശ്യമായ ചേരുവകൾ:
വാഴപ്പിണ്ടി- ഒരു കഷണം
തൈര് -രണ്ട് സ്പൂൺ
പച്ചമുളക്- രണ്ടെണ്ണം
ഇഞ്ചി – ആവശ്യത്തിന്
കറിവേപ്പില – ആവശ്യത്തിന്
ഉപ്പ് – ആവശ്യത്തിന്
തയ്യാറാക്കുന്ന വിധം:
മിക്സിയുടെ ജാറിലേക്ക് നാര് മാറ്റി കഷ്ണങ്ങളാക്കി വെച്ചിരിക്കുന്ന വാഴപ്പിണ്ടി തൈര്, കറിവേപ്പില, പച്ചമുളക്, ഇഞ്ചി, ഉപ്പ് എന്നിവ ചേർത്ത് അടിച്ചെടുക്കുക. ഇതിലേക്ക് രണ്ട് ഗ്ലാസ് വെള്ളം ഒഴിക്കുക. ഇത് മിക്സിയിൽ ഒരുവട്ടം കൂടി അടിച്ചെടുത്ത് ശേഷം അരിച്ചെടുക്കുക.യ ഉപ്പ് ആവശ്യമെങ്കിൽ ചേർത്ത് കൊടുക്കാം. നല്ലതുപോലെ ഇളക്കി കുടിക്കാവുന്നതാണ്.
