ഒരു മുസ്ലിം പള്ളി പോലുമില്ല; ഈ രാജ്യത്ത് പള്ളി പണിയാൻ അനുവാദമില്ല; ഇസ്ലാമിനെ ഒരു മതമായി പോലും അം​ഗീകരിക്കാത്ത ലോകത്തിലെ ഏക രാജ്യം

മിക്കവാറും എല്ലാ രാജ്യങ്ങളിലും ഇസ്ലാം മത വിശ്വാസികൾ ഉണ്ട്. മുസ്ലീം മത വിശ്വാസികൾ ഉള്ളയിടത്തെല്ലാം മസ്ജിദുകളും( മുസ്ലിം പള്ളികൾ) ഉണ്ടാവും. എന്നാൽ, മുസ്ലീങ്ങൾ ഉണ്ടായിട്ടും മസ്ജിദുകൾ ഇല്ലാത്ത ഒരു രാജ്യമുണ്ട്. ഇവിടെ ഇസ്ലാം മത വിശ്വാസികൾക്ക് നമസ്കരിക്കാൻ പള്ളികളില്ല. മസ്ജിദുകളുടെ നിർമ്മാണം ഈ രാജ്യത്ത് അനുവദനീയമല്ല. മറ്റെവിടെയും അല്ല. ഒരു മസ്ജിദു പോലും ഇല്ലാത്ത രാജ്യം സ്ലൊവാക്യയാണ്.

2010-ലെ റിപ്പോർട്ട് പ്രകാരം സ്ലൊവാക്യയിൽ ഏകദേശം 6,000 മുസ്ലീങ്ങൾ ഉണ്ടായിരുന്നു. അത് രാജ്യത്തെ ജനസംഖ്യയുടെ 0.1% ൽ താഴെ മാത്രമാണ്. യൂറോപ്യൻ യൂണിയനിൽ പള്ളിയില്ലാത്ത ഏക അംഗരാജ്യമാണ് സ്ലൊവാക്യ. പതിനേഴാം നൂറ്റാണ്ടിലാണ് മുസ്ലീങ്ങൾ ഇവിടെ താമസമാക്കിയത്. 2000-ൽ സ്ലോവാക്യയുടെ തലസ്ഥാനത്ത് ഇസ്ലാമിക് സെന്റർ സ്ഥാപിക്കുന്നതുമായി ബന്ധപ്പെട്ട് തർക്കമുണ്ടായിരുന്നു. സ്ലോവാക് ഇസ്ലാമിക് വഖ്ഫ്സ് ഫൗണ്ടേഷന്റെ അത്തരം ശ്രമങ്ങൾ തലസ്ഥാന മേയർ നിരസിക്കുകയും ചെയ്തു.

2015-ൽ യൂറോപ്പ് അഭയാർത്ഥി കുടിയേറ്റം അഭിമുഖീകരിക്കുന്ന സമയത്തും മുസ്ലീം അഭയാർത്ഥികളുടെ വരവ് സ്ലൊവാക്യ നിരോധിച്ചിരുന്നു. കൂടാതെ, 2016 നവംബർ 30-ന് സ്ലോവാക്യ ഇസ്‌ലാമിനെ ഔദ്യോഗിക മതത്തിന്റെ പദവി നൽകുന്നതിൽ നിന്ന് വിലക്കുന്ന നിയമം പാസാക്കി. ഈ രാജ്യം ഇസ്ലാമിനെ ഒരു മതമായി അംഗീകരിക്കുന്നില്ല. ഏറ്റവും കുറഞ്ഞത് 50,000 അനുയായികൾ ഉണ്ടെങ്കിൽ മാത്രമാണ് സ്ലോവാക്യയിൽ മതമായി അം​ഗീകരിക്കൂ.