വയനാട് എംപി രാഹുൽ ഗാന്ധി നടത്തിയ ‘ നിർഭാഗ്യവശാൽ’ പരാമർശത്തെ പരിഹസിച്ച് കേന്ദ്രമന്ത്രി അനുരാഗ് ഠാക്കൂർ. ചില സമയത്ത് സത്യം തനിയെ പുറത്തുവരുമെന്നും അദ്ദേഹം എംപിയായത് തീർത്തും ‘നിർഭാഗ്യകരമാണെന്നും’ അനുരാഗ് ഠാക്കൂർ പ്രതികരിച്ചു.
കഴിഞ്ഞ ദിവസം മാദ്ധ്യമങ്ങളെ അഭിസംബോധന ചെയ്യുന്നതിനിടെയാണ് രാഹുൽ ഗാന്ധിക്ക് നാക്കുപിഴ സംഭവിച്ചത്. Unfortunately I am a member of Parliament’ എന്ന് രാഹുൽ ഗാന്ധി പറയുകയും ഇതുകേട്ട് അടുത്തിരിക്കുകയായിരുന്ന മുതിർന്ന കോൺഗ്രസ് നേതാവ് ജയറാം രമേശ് അപ്പോൾ തന്നെ രാഹുലിനെ തിരുത്തുകയും ചെയ്തു. സംഭവത്തിന്റെ വീഡിയോ ദൃശ്യങ്ങൾ വൈറലായതോടെയാണ് കേന്ദ്രമന്ത്രി അനുരാഗ് ഠാക്കൂർ പ്രതികരണവുമായി രംഗത്തെത്തിയത്.
ചിലപ്പോഴൊക്കെ, വളരെ സ്വാഭാവികമായാണ് സത്യം പുറത്തേക്ക് വരിക. രാഹുൽ പറഞ്ഞതുപോലെ നിർഭാഗ്യവശാൽ അദ്ദേഹം പാർലമെന്റംഗമായി. രാഹുൽ പ്രതിനിധീകരിക്കുന്ന മഹത്തായ ഇന്ത്യൻ പാർലമെന്റിനെ വിദേശമണ്ണിൽ നിന്നുകൊണ്ട് അപകീർത്തിപ്പെടുത്തുകയും നുണ പറഞ്ഞുപരത്തുകയും ചെയ്യുന്നത് തീർത്തും നിർഭാഗ്യകരമാണ്. അതുകൊണ്ട് തന്നെ രാഹുൽ എന്ന വാക്കിന്റെ പൂർണരൂപം RAHUL – ‘Regretful Awful Hateful Ungrateful Liar’ എന്നതായി കണക്കാക്കണമെന്നും അദ്ദേഹം പറഞ്ഞു.
രാഹുൽ ചെയ്ത കുറ്റത്തിന് അദ്ദേഹം നിരുപാധികം മാപ്പ് ചോദിക്കുകയാണ് വേണ്ടത്. എന്നിട്ടിപ്പോഴും ഉപാധികൾ വയ്‌ക്കാനാണ് രാഹുലിന്റെ ശ്രമം. അദ്ദേഹം ഈ രാജ്യത്തിന്റെ ഭരണവ്യവസ്ഥയ്‌ക്ക് മുകളിലാണോ? സഭയിലെ നടപടിക്രമങ്ങൾക്ക് മുകളിലാണോ? തങ്ങൾ ഇപ്പോഴും പാർലമെന്റിനേക്കാൾ വലുതാണെന്ന തോന്നലാണോ ഗാന്ധി കുടുംബത്തിനുള്ളതെന്നും അനുരാഗ് ഠാക്കൂർ ചോദിച്ചു.
ശരാശരി ഹാജറിനേക്കാൾ താഴെയാണ് രാഹുലിന് പാർലമെന്റിലെ ഹാജറെന്നും കേന്ദ്രമന്ത്രി കുറ്റപ്പെടുത്തി. സഭയുടെ ചട്ടങ്ങൾക്കും നടപടിക്രമങ്ങൾക്കും സ്പീക്കറുടെ നിർദേശത്തിനും അനുസൃതമായാണ് പാർലമെന്റ് പ്രവർത്തിക്കുന്നത് എന്ന കാര്യം രാഹുൽ മനസിലാക്കണം. പക്ഷെ, സഭയിൽ എത്തി ചട്ടങ്ങൾ വായിക്കേണ്ടതുണ്ടെന്നും എങ്കിൽ മാത്രമേ മനസിലാക്കാൻ സാധിക്കൂവെന്നും അനുരാഗ് ഠാക്കൂർ വ്യക്തമാക്കി.
