നല്ല ഉറക്കം ലഭിക്കുമ്പോൾ മാത്രമാണ് നല്ല ആരോഗ്യവും ലഭിക്കുക. പലരും പല രീതിയിലാണ് ഉറങ്ങുന്നതും. ഇഷ്ടപ്പെട്ട രീതിയിൽ ഉറങ്ങുമ്പോൾ മാത്രമാണ് നമുക്ക് നല്ല ഉറക്കം ലഭിക്കുക. എന്നാൽ, നിങ്ങൾ കിടക്കുന്ന രീതി ശരീരത്തിന് ഒരു പക്ഷെ നല്ലതാവണമെന്നില്ല. മോശം ഉറക്കം കഴുത്തിലും തോളിലും പ്രത്യേകിച്ച് നട്ടെല്ലിലും സമ്മർദ്ദം ചെലുത്തും. ഇത് തുടർച്ചയായ നടുവേദനയ്ക്ക് കാരണമാകുകയും ചെയ്യും. പൊതുവെ നാം ഉറങ്ങുന്ന ചില പൊസിഷനുകളെപ്പറ്റി ഒന്നറിഞ്ഞിരിക്കുക.
ധാരാളം പേർ കമഴ്ന്ന് കിടന്ന് ഉറങ്ങുന്നുണ്ട്. കൂർക്കം വലി കുറയ്ക്കാനും നല്ല ഉറക്കം കിട്ടാനും കമഴ്ന്നു കിടക്കുന്നത് നല്ലതാണ്. എന്നാൽ, പുറത്തിനും കഴുത്തിനും കമഴ്ന്ന് കിടന്നുറങ്ങുന്നത് ദോഷം ചെയ്യും. നിങ്ങളുടെ ഭാരം ശരീരത്തിന്റെ മദ്ധ്യഭാഗത്തായതിനാൽ കമഴ്ന്നു കിടക്കുമ്പോൾ സമ്മർദ്ദമുണ്ടാകുന്നത് പുറംഭാഗത്തായിരിക്കും. കമഴ്ന്നു കിടന്ന് ഉറങ്ങിയതിന് ശേഷം എണീക്കുമ്പോൾ നടുവേദനയോ കഴുത്തുവേദനയോ ഉണ്ടാകാറുണ്ട്. പുറകിലെയും കഴുത്തിലെയും പേശികൾക്ക് പകലോ രാത്രിയോ വിശ്രമം ലഭിക്കുന്നില്ല എന്നതിനാലാണ് ഇങ്ങനെ സംഭവിക്കുന്നത്.
നേരെയാണ് കിടന്ന് ഉറങ്ങുന്നതെങ്കിൽ എല്ലാ പേശികളിലും ശരീരഭാരം തുല്യമായി വിതരണം ചെയ്യപ്പെടും. എന്നാൽ തലയണ ഉപയോഗിച്ചാണ് ഉറങ്ങുന്നതെങ്കിൽ കഴുത്ത് മാത്രം കുറച്ച് ഉയർന്നിരിക്കും. ചിലർക്ക് ഇത് കഴുത്തിന് പിന്നിലും നടുവിലും വേദനയ്ക്ക് കാരണമാകും.
ഇടതുവശം തിരിഞ്ഞുകിടന്ന് ഉറങ്ങുന്നതാണ് ഏറ്റവും ഉത്തമമെന്ന് ഡോക്ടർമാർ പറയുന്നു. ശ്വസനത്തിൽ പ്രധാന പങ്കുവഹിക്കുന്നത് വലത് ശ്വാസകോശമാണ്. ഇടതുവശം ചേർന്നുറങ്ങുമ്പോൾ വലത് ശ്വാസകോശത്തിന്റെ സ്ഥാനം മുകളിലായി വരും. ഇത് ശ്വസനവ്യവസ്ഥക്ക് മികച്ചതാണ്. ഗർഭിണികൾ ഈ രീതി പിന്തുടരുന്നതാണ് നല്ലത്.
