ഇന്ന് ലോക വനദിനം;നിത്യഹരിതവനങ്ങൾ മുതൽ ഹിമാലയൻ പർവ്വത നിരകൾ വരെ; വനമേഖലകളിലെ എല്ലാ വിഭാഗത്തിലും ഒരുപോലെ വർദ്ധന ഉണ്ടായ ഏകരാജ്യം ഇന്ത്യ

ഇന്ന് ലോക വനദിനം. ഭൂമിയിലെ ബഹുഭൂരിപക്ഷം ജൈവവൈവിധ്യത്തിന്റെയും ഉറവിടമാണ് കാടുകൾ. ഏകദേശം 160 കോടി ജനങ്ങൾ അവരുടെ ഭക്ഷണം, താമസം, ഊർജ്ജം, മരുന്ന് എന്നിവയ്‌ക്കായി കാടിനെ ആശ്രയിക്കുന്നു. എന്നാൽ അതിജീവനത്തിന്റെ അവസാന ശ്രമത്തിലാണ് ഓരോ കാടും. വനങ്ങളെ സംരക്ഷിക്കാനും വിലമതിക്കാനും ജീവജാലങ്ങളുടെ നിലനിൽപ്പിൽ വനങ്ങളുടെ പ്രാധാന്യവുമാണ് ഓരോ മാർച്ച് 21-ഉം ഓർമ്മപ്പെടുത്തുന്നത്. ഒരു വർഷം ശരാശരി ഒരു കോടി ഹെക്ടർ വനമേഖലയാണ് നഷ്ടപ്പെട്ടുകൊണ്ടിരിക്കുന്നത്. 1990-ന് ശേഷം മാത്രം 42 കോടി ഹെക്ടർ വനം നഷ്ടപ്പെട്ടതായി കണക്കാക്കപ്പെടുന്നു. പൂർണമായും നഷ്ടപ്പെട്ടതോ നശിപ്പിക്കപ്പെട്ടതോ ആയ വന ആവാസ വ്യവസ്ഥയുടെ പുനസ്ഥാപനം എന്നത്തെക്കാളുമേറെ പ്രാധാന്യമർഹിക്കുന്ന കാലഘട്ടത്തിലൂടെയാണ് നമ്മൾ കടന്ന് പോകുന്നത്.

വനമേഖലയുടെയും വനമേഖലയ്‌ക്ക് പുറത്തുള്ള വൃക്ഷങ്ങളുടെയും വനപ്രദേശങ്ങളുടെയും ശാസ്ത്രീയമായ അവലോകനം കാലാനുസൃതമായി നടപ്പിലാക്കുന്നത് ഇന്ത്യ ഉൾപ്പെടെ വളരെ കുറച്ച് രാജ്യങ്ങൾ മാത്രമാണ്. വന മേഖലകളുടെ സംരക്ഷണത്തിൽ രാജ്യം ഏറെ മുന്നിലാണ്. 2019-ലെ ഫോറസ്റ്റ് സർവേ ഓഫ് ഇന്ത്യയുടെ കണക്ക് പ്രകാരം, വനമേഖലകളിലെ എല്ലാ വിഭാഗത്തിലും ഒരുപോലെ വർദ്ധന ഉണ്ടായ ഏകരാജ്യം ഇന്ത്യയാണ്. ആന്റമാൻ നിക്കോബാർ ദ്വീപുകൾ, പശ്ചിമഘട്ട മലനിരകൾ, വടക്കുകിഴക്കൻ സംസ്ഥാനങ്ങൾ എന്നീ പ്രദേശങ്ങളിൽ കാണപ്പെടുന്ന നിത്യഹരിത വനങ്ങൾ മുതൽ ഹിമാലയൻ പർവ്വതനിരകൾ വരെയുള്ള വിവിധ വനമേഖലാ പ്രദേശങ്ങളാണ് രാജ്യത്തുള്ളത്.

ഓരോ വർഷവും പ്രത്യേക ഉദ്ദേശലക്ഷ്യങ്ങളോടെയാണ് വനദിനം ആചരിക്കപ്പെടുന്നത്.’ വനങ്ങളും ആരോഗ്യവും’ എന്നതാണ് 2023-ലെ വനദിനത്തിലെ പ്രമേയം.
കാടുകൾ നമ്മുടെ ആരോഗ്യവുമായി ഏറെ ബന്ധപ്പെട്ടിരിക്കുന്നു. വെള്ളം ശുദ്ധീകരിക്കുന്നതിലും വായു ശുദ്ധീകരിക്കുന്നതിലും വനങ്ങൾ വഹിക്കുന്ന പങ്ക് ചെറുതല്ല. കാലാവസ്ഥാ വ്യതിയാനത്തിനെതിരെ പോരാടുന്നതിന് കാർബൺ പിടിച്ചെടുക്കുന്നു, ഭക്ഷണവും ജീവൻ രക്ഷിക്കുന്ന മരുന്നുകളും നൽകുന്നു, അതുവഴി നമ്മുടെ ക്ഷേമം മെച്ചപ്പെടുത്തുകയും ചെയ്യുന്നുണ്ട് കാടുകൾ. ഈ അമൂല്യമായ പ്രകൃതി വിഭവങ്ങൾ സംരക്ഷിക്കേണ്ടത് നമ്മളാണ്.ആരോഗ്യമുള്ള വനങ്ങൾ ആരോഗ്യമുള്ള ആളുകളെ കൊണ്ടുവരുമെന്നതാണ് യുഎൻ ഇന്നേ ദിനത്തിൽ പ്രചരിപ്പിക്കാൻ ലക്ഷ്യം വെയ്‌ക്കുന്നത്.

1971-ൽ, ഫുഡ് ആൻഡ് അഗ്രികൾച്ചർ ഓർഗനൈസേഷന്റെ 16-ാമത് സമ്മേളനത്തിലാണ് ആദ്യമായി ലോക വനവത്ക്കരണ ദിനം എന്ന ആശയം ഉത്ഭവിക്കുന്നത്.
പിന്നീട് 2007-ൽ സെന്റർ ഫോർ ഇന്റർനാഷണൽ ഫോറസ്ട്രി റിസർച്ച് ഈ പ്രമേയത്തിലൂന്നി 2012 വരെ ആറ് വനദിനങ്ങൾ ആചരിച്ചു. ഒടുവിൽ 2011-ൽ ഐക്യരാഷ്‌ട്ര സഭ അന്താരാഷ്‌ട്ര വനവർഷം ആചരിച്ചു. ഇതിന്റെ ചുവട് പിടിച്ചാണ് 2012 നവംബർ 28-ന് ഐക്യരാഷ്‌ട്രസഭാ പൊതുസമ്മേളനം മാർച്ച് 21 അന്താരാഷ്‌ട്ര വനദിനമായി പ്രഖ്യാപിച്ചത്. ഭൂമിയിൽ ജീവന്റെ നിലനിൽപ്പിന് സഹായിക്കുന്നവരാണ് വനങ്ങൾ. അവെയ സംരക്ഷിക്കാൻ മുന്നോട്ട് വരണമെന്നായിരുന്നു ആദ്യ സമ്മേളനം മുന്നോട്ടുവെച്ച ആശയം.