ലോകത്തിലെ ഏറ്റവും വിഷമുള്ള പാമ്പുകളിലൊന്നായ ഈസ്റ്റേൺ ബ്രൗൺ സ്നേക്കിൽ നിന്നും തലനാരിഴയ്ക്ക് രക്ഷപ്പെട്ട് യുവതി. കിടപ്പുമുറിയിലെ കട്ടിലിൽ നിന്നാണ് യുവതി പാമ്പിനെ കണ്ടെത്തിയത്. ആറടി നീളമുള്ള പാമ്പ് തന്റെ ബെഡ്ഡിൽ കിടക്കുന്ന ചിത്രം യുവതി സമൂഹമാദ്ധ്യമത്തിലൂടെ പങ്കുവയ്ക്കുകയും ചെയ്തു. ഓസ്ട്രേലിയയിലെ മരൂണിലുള്ള ഒരു ഉൾഗ്രാമത്തിലാണ് സംഭവം നടന്നത്.
യുവതിയുടെ ഫോൺകോൾ ലഭിച്ചതിന് പിന്നാലെ ക്വീൻസ് ലാൻഡിൽ നിന്നുള്ള പാമ്പുപിടിത്തക്കാരനായ സാച്ചറി റിച്ചാർഡ് ഉടൻ സ്ഥലത്തെത്തി രക്ഷാപ്രവർത്തനം നടത്തി. പുറത്ത് കനത്ത ചൂടായതിനാൽ സുഖകരമായ അന്തരീക്ഷം നോക്കി വീടനകത്തേക്ക് പാമ്പ് എത്തിയതാകാമെന്നാണ് കരുതുന്നത്. പാമ്പിനെ പിടികൂടിയ ശേഷം ജനവാസമേഖലയിൽ നിന്ന് മാറി വനമേഖലയിൽ തുറന്നുവിട്ടുവെന്ന് റിച്ചാർഡ് അറിയിച്ചു.
കിഴക്കൻ ഓസ്ട്രേലിയയിൽ സാധാരണയായി കണ്ടുവരുന്ന പാമ്പാണ് ഈസ്റ്റേൺ ബ്രൗൺ സ്നേക്ക്. രാജ്യത്തെ ഏറ്റവും അപകടകാരിയായ പാമ്പുകളിലൊന്നാണിത്. ഏറ്റവും കൂടുതൽ പേർ പാമ്പുകടിയേറ്റ് മരിച്ചിരിക്കുന്നത് ബ്രൗൺ സ്നേക്ക് ആക്രമിച്ചതിനെ തുടർന്നാണ്.
