ത്രിദിന സംയുക്ത സൈനിക ഉദ്യോഗസ്ഥരുടെ സമ്മേളനം; പ്രധാനമന്ത്രി നരേന്ദ്രമോദി അഭിസംബോധന ചെയ്യും

ന്യൂഡൽഹി: മദ്ധ്യപ്രദേശിലെ ഭോപ്പാലിൽ വച്ച് നടക്കുന്ന ത്രിദിന സംയുക്ത സൈനിക ഉദ്യോഗസ്ഥരുടെ സമ്മേളനത്തിൽ (ജോയിന്റ് കമാൻഡേഴ്സ് കോൺഫറൻസ്) പ്രധാനമന്ത്രി നരേന്ദ്രമോദി പങ്കെടുക്കും. ഉന്നത സൈനിക മേധാവികളെ അദ്ദേഹം അഭിസംബോധന ചെയ്യും. മാർച്ച് 30 മുതൽ ഏപ്രിൽ 1 വരെയാണ് പരിപാടി നടക്കുക. ഭോപ്പാലിലെ കുശാഭൗ താക്കറെ ഹാളിലാണ് ഇത്തവണ സംയുക്ത സൈനിക സമ്മേളനം സംഘടിപ്പിക്കുന്നത്. ചീഫ് ഓഫ് ഡിഫൻസ് സ്റ്റാഫ് ജനറൽ അനിൽ ചൗഹാൻ, ഇന്ത്യൻ ആർമി ചീഫ് ജനറൽ മനോജ് പാണ്ഡെ, നേവി ചീഫ് അഡ്മിറൽ ആർ ഹരി കുമാർ, എയർ ചീഫ് മാർഷൽ വി ആർ ചൗധരി എന്നിവരടക്കമുള്ള ഉന്നത ഉദ്യോഗസ്ഥർ പ്രധാനമന്ത്രിക്കൊപ്പമുണ്ടാകും.

ഏപ്രിൽ ഒന്നിന് ഇന്ത്യൻ സായുധ സേനയുടെ ഉന്നത സൈനിക കമാൻഡർമാരെ പ്രധാനമന്ത്രി അഭിസംബോധന ചെയ്യുകയും അവരുമായി നിലവിലെയും ഭാവിയിലെയും സുരക്ഷാ വെല്ലുവിളികളെ കുറിച്ചും പദ്ധതികൾ നടപ്പാക്കുന്നതിനെക്കുറിച്ചും ചർച്ച നടത്തും. ഉന്നത സൈനിക ഉദ്യോഗസ്ഥരുമായി ആറുമണിക്കൂറോളം ചെലവഴിക്കുന്ന പ്രധാനമന്ത്രി, പ്രതിരോധ മേഖലയിലെ തദ്ദേശീയ കണ്ടുപിടുത്തങ്ങളുടെ പ്രദർശനവും സന്ദർശിക്കും.

പ്രതിരോധ മേഖലയിൽ മെയ്‌ക്ക് ഇൻ ഇന്ത്യയുടെ നവീകരണവും നടപ്പാക്കലും സൈന്യം പ്രദർശിപ്പിക്കും. പരിപാടിയുടെ ആദ്യ ദിവസം സിഡിഎസ് ജനറൽ അനിൽ ചൗഹാൻ, മൂന്ന് സേനാ മേധാവികൾ ഉൾപ്പെടെയുള്ള സൈനിക മേധാവികളെ അഭിസംബോധന ചെയ്യും. പ്രതിരോധ മന്ത്രി രാജ്നാഥ് സിംഗ് അടുത്ത ദിവസം സൈനിക മേധാവികളെ അഭിസംബോധന ചെയ്യും. സിഡിഎസ്, സർവീസ് മേധാവികൾ എന്നിവരെ കൂടാതെ, സിഐഎസ്സിയുടെ മൂന്ന് ഉപ മേധാവികൾ, ഏഴ് ആർമി കമാൻഡ് മേധാവികൾ, ആറ് എയർ കമാൻഡ് മേധാവികൾ, ഇന്ത്യൻ നാവികസേനയുടെ മൂന്ന് കമാൻഡ് മേധാവികൾ എന്നിവരുൾപ്പെടെയുള്ള കരസേനാ ഉദ്യോഗസ്ഥർ പരിപാടിയിൽ പങ്കെടുക്കും.