ഓസ്കർ നേട്ടത്തിന് പിന്നാലെ ആർആർആർ ടീമിനെ അനുമോദിച്ച് തെലുങ്ക് താരം ചിരഞ്ജീവി. സംവിധായകൻ രാജമൗലിയെയും സംഗീത സംവിധായകൻ കീരവാണിയെയുമാണ് ചിരഞ്ജീവി പൊന്നാട അണിയിച്ച് അനുമോദിച്ചത്.
‘നാട്ടു നാട്ടു’ ഗാനത്തിന് ഓസ്കർ ലഭിച്ചതിന്റെ സന്തോഷം പങ്കുവെയ്ക്കുകയായിരുന്നു താരം. ചിരഞ്ജീവിയുടെ മകനും ആർആർആറിലെ നായകന്മാരിലൊരാളുമായ രാം ചരണിന്റെ പിറന്നാൾ ദിനത്തിലായിരുന്നു അനുമോദനം.
രാജമൗലിയ്ക്കും കീരവാണിയ്ക്കുമൊപ്പമുള്ള ചിത്രങ്ങൾ താരം തന്നെ ഇൻസ്റ്റഗ്രാമിൽ പങ്കുവെച്ചിട്ടുണ്ട്. ചിത്രത്തിന് കമന്റുമായി നിരവധി പേരാണ് എത്തിയത്.
ശങ്കർ സംവിധാനം ചെയ്യുന്ന പുതിയ ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും രാം ചരണിന്റെ പിറന്നാൾ ദിനത്തിൽ പുറത്തുവിട്ടിരുന്നു. ‘ഗെയിം ചേഞ്ചർ’ എന്നാണ് ചിത്രത്തിന്റെ പേര്.
ജയറാം, അഞ്ജലി, സമുദ്രക്കനി, എസ്ജെ സൂര്യ തുടങ്ങി വൻ താരനിരയാണ് ചിത്രത്തിലുള്ളത്. തമിഴ്, ഹിന്ദി, തെലുങ്ക് ഭാഷകളിലും ചിത്രം റിലീസ് ചെയ്യും. ‘ആർസി 15’ എന്നായിരുന്നു ചിത്രത്തിന് ഇതുവരെ നൽകിയിരുന്ന പേര്.
