ശരീരത്തിന് പ്രോട്ടീൻ ആവശ്യമാണ്? വാസ്തവമെന്ത്..

ആരോഗ്യമുള്ള ശരീരത്തിന് പ്രോട്ടീൻ അത്യാവശ്യമാണ്. എന്നാൽ പ്രോട്ടീൻ ഷേക്കുകൾ കുടിച്ച് വരുത്തേണ്ടതല്ല, പ്രോട്ടീൻ. അതിനായി നമ്മുടെ ഭക്ഷണത്തിൽ പ്രോട്ടീൻ അടങ്ങിയ ആഹാരമാണ് ഉൾപ്പെടുത്തേണ്ടത്. ശരീരഭാരത്തിന്റെ ഒരു പൗണ്ടിന് പ്രതിദിനം കുറഞ്ഞത് 0.7 ഗ്രാം പ്രോട്ടീൻ കഴിക്കുന്നത് ശക്തി വർദ്ധിപ്പിക്കുന്നതിന് സഹായകരമാകും.

പ്രോട്ടീന്റെ കുറവ് മൂലം ഹോർമോൺ വ്യതിയാനം, പേശികൾക്ക് നിരവധി പ്രശ്നങ്ങൾ, രക്തത്തിലെ പഞ്ചസാരയുടെ അളവിനെയും പ്രോട്ടീൻ ബാധിക്കുന്നു. കോശകലകൾ, പേശികൾ, ഹോർമോണുകൾ എന്നിവ നിർമ്മിക്കുന്നതിനും ആന്റിബോഡികൾ നിർമ്മിക്കുന്നതിനും കാരണമാകുന്ന ഏറ്റവും അവശ്യ പോഷകങ്ങളിൽ ഒന്നാണിത്. ശരീരത്തിനെ പ്രോട്ടീൻ സമ്പുഷ്ടമാക്കേണ്ടത് അനിവാര്യമാണ്. അതിനായി ഈ ഭക്ഷണങ്ങൾ നിത്യവും ശീലമാക്കാം.

പ്രോട്ടീന്റെ കുറവ് മൂലം ഉണ്ടാകുന്ന രോഗങ്ങൾ ചില്ലറയല്ല, മുടി കൊഴിച്ചിലും ക്ഷീണവുമൊക്കെ ഒരുപക്ഷേ ഇതുകൊണ്ടാകാം. അസ്ഥിരമായ മാനസികാവസ്ഥ, ക്ഷോഭം, സ്ഥലകാല ബോധം നഷ്ടപ്പെടൽ എന്നിവയുമായി ബന്ധപ്പെട്ടിരിക്കുന്നു. നമ്മുടെ മാനസികാവസ്ഥയ്‌ക്ക് ഉത്തരവാദികളായ വിവിധതരം ഹോർമോണുകളും ന്യൂറോ ട്രാൻസ്മിറ്ററുകളും സമന്വയിപ്പിക്കുന്നതിന് പ്രോട്ടീൻ നിർണ്ണായകമാണ്. രക്തത്തിലെ പഞ്ചസാരയുടെ അളവ് കുറയാൻ ഇടയാക്കുന്നതും പ്രോട്ടീന്റെ കുറവ് മൂലമാകാം. വിറ്റാമിൻ ഡി, കാൽസ്യം എന്നിവയ്‌ക്കൊപ്പം അസ്ഥികളുടെ ആരോഗ്യത്തിനും ദീർഘായുസ്സിനും ഭക്ഷണ പ്രോട്ടീൻ നിർണ്ണായകമാണ്.

പ്രോട്ടീൻ എന്ന് കേട്ടാൽ ആദ്യം ഓർമ വരുന്നത് മുട്ട ആകുമല്ലോ, പ്രോട്ടീന്റെ കലവറയാണ് മുട്ട. ഒരു മുട്ട ആറ് ഗ്രാം പ്രോട്ടീനാണ് നൽകുന്നത്. ഒപ്പം വിറ്റാമിൻ ഡിയുടെ ഉറവിടവുമാണ് മുട്ട. ഇതിൽ അടങ്ങിയിരിക്കുന്ന പോഷകങ്ങളും ആന്റിഓക്സിഡന്റുകളും കണ്ണുകൾക്ക് ഗുണം ചെയ്യും. കട്ടി തൈരും പ്രോട്ടീന്റെ മികച്ച കേന്ദ്രമാണ്. പ്രോട്ടീനിനൊപ്പം വിറ്റാമിൻ ബി 12, വിറ്റാമിൻ എ, കാൽസ്യം എന്നിവയും അടങ്ങിയിട്ടുണ്ട്. ഏകദേശം അര കപ്പ് തൈര് ഏകദേശം 10 ഗ്രാം പ്രോട്ടീൻ നൽകുന്നു. കൂടാതെ കാൽസ്യം ധാരാളം അടങ്ങിയിട്ടുണ്ട്. ഇത് പല്ലുകളുടെയും എല്ലുകളുടെയും ആരോഗ്യത്തിന് പ്രധാനമാണ്. തൈരിനൊപ്പം തന്നെ പ്രധാനമാണ് പാലും. 200 മില്ലിലിറ്റർ പാൽ 7.2 ഗ്രാം പ്രോട്ടീൻ നൽകുന്നു. കൂടാതെ അയോഡിൻ, വിറ്റാമിൻ ബി 12, കാൽസ്യം എന്നിവയുൾപ്പെടെ നിരവധി പോഷകങ്ങളുടെ നല്ല ഉറവിടമാണിത്.

100 ഗ്രാം കോഴിയിറച്ചി ഏകദേശം 27 മുതൽ 29 ഗ്രാം വരെ പ്രോട്ടീൻ നൽകുന്നു. മാംസങ്ങൾ കൊഴുപ്പ് കുറഞ്ഞ ഭക്ഷണമാണ്. കൂടാതെ വിറ്റാമിൻ ബി 6, ബി 12 എന്നിവയുടെ മികച്ച ഉറവിടവുമാണ്. ഇത് ചുവന്ന രക്താണുക്കളുടെ രൂപീകരണത്തിനും നാഡീവ്യവസ്ഥയെ ആരോഗ്യകരമായി നിലനിർത്തുന്നതിനും പ്രധാനമാണ്. വിറ്റാമിൻ ബി, ബി 12 എന്നിവയുടെ ഉറവിടം കൂടിയായതിനാൽ ചിക്കന് മറ്റ് നിരവധി ഗുണങ്ങളുണ്ട്, ഇത് ഹൃദയ സംബന്ധമായ അസുഖങ്ങളുടെയും ചീത്ത കൊളസ്ട്രോളിന്റെയും സാധ്യത കുറയ്‌ക്കാൻ സഹായിക്കുന്നു.

പ്രോട്ടീൻ സമ്പന്നമാണ് ഓട്സ്. കാർബോഹൈഡ്രേറ്റും പ്രോട്ടീനും ഇതിൽ അടങ്ങിയിട്ടുണ്ട്. പഴങ്ങൾ, പരിപ്പ് എന്നിവയ്‌ക്കൊപ്പവും പാൻകേക്കുകളുടെ രൂപത്തിലും കഴിക്കാവുന്നതാണ്. സോയ മിൽക്കിൽ 6.6 ഗ്രാം പ്രോട്ടീൻ നൽകുന്നു. ഇതിൽ കൊഴുപ്പും കലോറിയും കുറവാണ്. പഞ്ചസാര ചേർക്കാതെ മധുരമില്ലാത്ത പാൽ കഴിക്കുന്നത് നല്ലതാണ്.