കോഴിക്കോട് : ട്രെയിൻ യാത്രയ്ക്കിടെ പെണ്കുട്ടിയെ നിർബന്ധിച്ച് മദ്യംനല്കി പീഡിപ്പിച്ചെന്ന കേസുമായി ബന്ധപ്പെട്ട് സമൂഹ മാധ്യമങ്ങളില് നടക്കുന്ന പ്രചാരണം വ്യാജമെന്ന് റെയില്വേ പോലീസ്. പീഡനം നടന്നിട്ടില്ലെന്ന മെഡിക്കല് റിപ്പോര്ട്ടോ മറ്റോ പോലീസ് നല്കിയിട്ടില്ലെന്നും കേസില് ഇപ്പോഴും അന്വേഷണം തുടരുകയാണെന്നും കേസിന്റെ അന്വേഷണച്ചുമതലയുള്ള റെയില്വേ പോലീസ് ഇന്സ്പെക്ടര് ക്രിസ്പിന്, എസ്.ഐ. ഷാനിഫ് എന്നിവര് പറഞ്ഞു.
രാജധാനി എക്സ്പ്രസില്വെച്ച് ബിരുദാനന്തര ബിരുദ വിദ്യാര്ഥിനിയെ മദ്യം നല്കി പീഡിപ്പിച്ചെന്നാണ് പരാതി . ഇതിൽ പത്തനംതിട്ട കടപ്ര നിരണം സ്വദേശിയെ റെയില്വേ പോലീസ് അറസ്റ്റ് ചെയ്തിരുന്നു . ഉഡുപ്പിയില്നിന്ന് തീവണ്ടിയില് കയറിയ വിദ്യാര്ഥിനിയുമായി സൗഹൃദം സ്ഥാപിക്കുകയും പിന്നാലെ നിര്ബന്ധിച്ച് മദ്യം നല്കി ലൈംഗികാതിക്രമം നടത്തിയെന്നുമായിരുന്നു പരാതി.
അതേസമയം, പെണ്കുട്ടി പീഡനത്തിനിരയായിട്ടില്ലെന്ന് മെഡിക്കല് റിപ്പോര്ട്ട് വന്നെന്നും പോലീസ് ഇക്കാര്യം കോടതിയെ അറിയിക്കുമെന്നുമാണ് സമൂഹമാധ്യമങ്ങളില് പ്രചരിച്ചിരുന്നത്. എന്നാല് ഈ പ്രചാരണമെല്ലാം തീര്ത്തും വ്യാജമാണെന്നാണ് റെയില്വേ പോലീസിന്റെ പ്രതികരണം.
കേസില് പെണ്കുട്ടിയുടെ രഹസ്യമൊഴി രേഖപ്പെടുത്തിയിട്ടുണ്ട്. പെണ്കുട്ടി ഇപ്പോഴും പരാതിയില് ഉറച്ചുനില്ക്കുകയാണ്. കേസില് അന്വേഷണം തുടരുകയാണെന്നും റെയില്വേ പോലീസ് പറഞ്ഞു.
