ന്യൂഡൽഹി : രാമനവമിയോട് അനുബന്ധിച്ച് ദുർഗ്ഗാദേവി ക്ഷേത്രത്തിൽ ദർശനം നടത്തി ഭക്തർ. ഡൽഹി ഛത്തർപൂരിലെ ദുർഗ്ഗാദേവി ക്ഷേത്രത്തിൽ രാമനവമി ദിനത്തിൽ വൻ ഭക്തജനത്തിരക്കാണ് അനുഭവപ്പെടുന്നത്. ശ്രീരാമന്റെ ജനനത്തോടനുബന്ധിച്ച് എല്ലാ വർഷവും ചൈത്ര നവരാത്രിയുടെ അവസാന ദിവസമാണ് രാമനവമി രാജ്യമൊട്ടാകെ ആഘോഷിക്കുന്നത്. ഈ ശുഭദിനത്തിൽ, ദുർഗ്ഗാദേവിയുടെ ഒമ്പത് രൂപങ്ങളുടെ വേഷം ധരിക്കുന്ന പെൺകുട്ടികൾക്ക് സമ്മാനങ്ങളും പ്രസാദവും സമർപ്പിക്കുന്നത് ഇവിടത്തെ ചടങ്ങാണ്. ക്ഷേത്രത്തിൽ പുലർച്ചെ നടക്കുന്ന ആരതിയിൽ പങ്കെടുക്കാനും പ്രാര്ഥനക്കുമായി അർധരാത്രിയോടെ നിരവധി ഭക്തജനങ്ങളാണ് എത്തിയത്.
അതേസമയം കാളി ദേവിയുടെ പ്രതിഷ്ഠയുള്ള കൽക്കാജി മന്ദിറിലും ഭക്തർ ഒഴുകിയെത്തി. കൽക്കാജി ക്ഷേത്രത്തിലെ രാമനവമി ക്രമീകരണങ്ങളും ഒരുക്കങ്ങളും ഭക്തി സാന്ദ്രമാക്കി. ഡൽഹിയിലെ കൽക്കാജിയിലാണ് ഈ ക്ഷേത്രം സ്ഥിതി ചെയ്യുന്നത്. ക്ഷേത്രത്തിന്റെ പേരിലാണ് ഈ പ്രദേശം അറിയപ്പെടുന്നത് തന്നെ. ഡൽഹിയിലെ പ്രമുഖ ഹിന്ദു ക്ഷേത്രങ്ങളിൽ ഒന്നാണ് കൽക്കാജി മന്ദിർ. ദേവിയെ ദർശിക്കാൻ ആയിരക്കണക്കിന് ആളുകളാണ് ഈ ദിവസം എത്തുന്നത്.
ഈ അവസരത്തിൽ പ്രധാനമന്ത്രി നരേന്ദ്രമോദി ട്വിറ്ററിലൂടെ രാജ്യത്തെ ജനങ്ങൾക്ക് ആശംസകൾ നേർന്നു. ”രാമനവമിയുടെ ഐശ്വര്യപൂർണമായ ദിനത്തിൽ രാജ്യത്തെ എല്ലാ ജനങ്ങൾക്കും ആശംസകൾ. ത്യാഗത്തിലും തപസ്സിലും സംയമനത്തിലും നിശ്ചയദാർഢ്യത്തിലും അധിഷ്ഠിതമായ മര്യാദ പുരുഷോത്തമൻ ശ്രീരാമചന്ദ്രന്റെ ജീവിതം എല്ലാ കാലഘട്ടത്തിലും മാനവികതയുടെ പ്രചോദനമായി നിലനിൽക്കും”- എന്ന് പ്രധാനമന്ത്രി ട്വീറ്റ് ചെയ്തു.
”നമ്മുടെ ജീവിതത്തിന്റെ എല്ലാ മേഖലകളിലും നമുക്ക് മര്യാദ പുരുഷോത്തമനായ ശ്രീരാമന്റെ ആദർശങ്ങൾ ഉൾക്കൊള്ളാം അതിലൂടെ ഇന്ത്യയെ മഹത്തായ രാഷ്ട്രമാക്കാൻ സ്വയം സമർപ്പിക്കാം” എന്ന് രാഷ്ട്രപതി ദ്രൗപദി മുർമു ട്വീറ്റ് ചെയ്തു.
Comments