മാമാങ്കത്തിലൂടെ മലയാള സിനിമയിലെത്തിയ പ്രാചി തെഹ്ലാൻ വിവാഹിതയാകുന്നു. വ്യവസായിയും ഡൽഹി സ്വദേശിയുമായ രോഹിത് സരോഹയാണ് വരൻ. വിവാഹവാർത്ത പ്രാചി തന്നെയാണ് സമൂഹമാദ്ധ്യമത്തിലൂടെ ആരാധകരെ അറിയിച്ചത്. ഓഗസ്റ്റ് 7-ന് ഡൽഹിയിൽ വെച്ചാണ് വിവാഹം.
കൊറോണ വീണ്ടും കൂടിയ സാഹചര്യത്തിൽ മാനദണ്ഡങ്ങൾ പാലിച്ചാണ് വിവാഹം. 50 പേരെ മാത്രം ഉൾക്കൊള്ളിച്ചുകൊണ്ട് ഒരേ ദിവസമായിരിക്കും വിവാഹ നിശ്ചയവും വിവാഹവും നടക്കുന്നത്. ഓരോ അതിഥികളുടെയും ആരോഗ്യം തനിക്ക് അത്രമേൽ പ്രാധാനപെട്ടതാണ്. അതുകൊണ്ട് വലിയ വേദിയാണ് വിവാഹത്തിനായി ഒരുക്കുന്നത്. എന്നിരുന്നാലും 30 മിനിട്ട് ഇടവേളയിലാണ് അതിഥികളെ ചടങ്ങുകൾ നടക്കുന്നിടത്തേക്ക് പ്രവേശിപ്പിക്കുന്നത്.
പ്രാചിയുടെ മലയാളത്തിലെ അരങ്ങേറ്റ ചിത്രമായിരുന്നു മമ്മൂട്ടി നായകനായെത്തിയ മാമാങ്കം. ഉണ്ണിമായ എന്ന കഥാപാത്രത്തെയാണ് പ്രാചി ചിത്രത്തിൽ അവതരിപ്പിച്ചത്. 2016-ൽ ദിയ ഔർ ബാത്തി ഹം എന്ന ടെലിവിഷൻ സീരിയലിലൂടെ പ്രാചി അഭിനയരംഗത്ത് തുടക്കം കുറിക്കുന്നത്. പിന്നീട് മൻദുയിപ് സിംഗ് സംവിധാനം ചെയ്ത റോഷൻ പ്രിൻസ് നായകനായ 2017 ലെ പഞ്ചാബി ഫിലിം അർജാൻ എന്ന സിനിമയിൽ നായിക കഥാപാത്രത്തെ അവതരിപ്പിച്ചുകൊണ്ട് സിനിമാ രംഗത്തേക്ക് കടന്നുവന്നു.
ഡൽഹിയിലാണ് പ്രാചി ജനിച്ചതും വളർന്നതും. പഠനകാലത്ത് തന്നെ കായിക രംഗത്ത് സജീവമായിരുന്ന പ്രാചി ഇന്ത്യൻ നെറ്റ്ബോൾ താരമായിരുന്നു. 2010- ലെ കോമൺവെൽത്ത് ഗെയിംസിലും 2010-2011 ലെ മറ്റ് ഏഷ്യൻ ചാമ്പ്യൻഷിപ്പിലും ഇന്ത്യയെ പ്രതിനിധീകരിച്ച ഇന്ത്യ നെറ്റ്ബോൾ ടീമിന്റെ ക്യാപ്റ്റനായിരുന്നു പ്രാചി. പ്രാചിയുടെ നായകത്വത്തിൽ 2011 ലെ സൗത്ത് ഏഷ്യൻ ബീച്ച് ഗെയിംസിൽ ഇന്ത്യ ആദ്യമായി കിരീടം സ്വന്തമാക്കിയത്. നെറ്റ്ബോൾ ഡെവലപ്മെന്റ് ട്രസ്റ്റ് ഇന്ത്യയുടെ 2011-2017ലെ ബ്രാൻഡ് അംബാസിഡറും കൂടിയാണ്.
