സാധാരണ സാൻഡ്വിച്ച് കഴിക്കാൻ നിങ്ങൾ എത്രരൂപ ചിലവാക്കാറുണ്ട്? 100 മുതൽ 500 രൂപ വരെ വിലമതിക്കുന്ന സാൻഡ് വിച്ചുകൾ പലതവണ നാം കഴിച്ചിരിക്കാം. ആഡംബര ഹോട്ടലിൽ എത്തിപ്പെട്ടുവെങ്കിൽ ആയിരം രൂപ വരെയുള്ള സാൻഡ്വിച്ചുകളും ലഭ്യമാണ്. അതായത് പരമാവധി 1,000 രൂപ ഈടാക്കുന്ന സാൻഡ്വിച്ചുകൾ നാം കഴിച്ചിട്ടുണ്ടാകും. എന്നാൽ സാധാരണയേക്കാൾ പത്തിരട്ടിയിലധികം വിലവരുന്ന സാൻഡ്വിച്ചിനെക്കുറിച്ച് കേട്ടിട്ടുണ്ടോ..
ലോകത്തിലെ ഏറ്റവും വിലകൂടിയ സാൻഡ്വിച്ചിന്റെ കാര്യമാണ് ഈ പറഞ്ഞുവരുന്നത്. ന്യൂയോർക്കിലെ ‘സെറെൻഡിപിറ്റി3’ എന്ന റെസ്റ്റോറന്റിലാണ് ഇത് വിൽക്കുന്നത്. ഇവിടുത്തെ സ്പെഷ്യൽ സാൻഡ്വിച്ചിന് റെസ്റ്റോറന്റ് ഈടാക്കുന്നത് 214 ഡോളറാണ്. അതായത് 17,500 രൂപയോളം വില. ലോകത്തെ ഏറ്റവും വിലമതിക്കുന്ന സാൻഡ്വിച്ച് എന്ന ഗിന്നസ് റെക്കോർഡ് 2014ൽ തന്നെ കക്ഷി കരസ്ഥമാക്കിയിട്ടുമുണ്ട്.
സെറെൻഡിപിറ്റി3 എന്ന റെസ്റ്റോറന്റിലേക്ക് നേരെ കയറിച്ചെന്ന് ഓർഡർ ചെയ്താലൊന്നും ഇപ്പറഞ്ഞ സാൻഡ്വിച്ച് കിട്ടില്ല. കുറഞ്ഞത് എട്ട് മണിക്കൂർ മുമ്പെങ്കിലും ഇത് ബുക്ക് ചെയ്യേണ്ടതുണ്ട്. എന്താണിതിന് ഇത്രവിലയെന്ന് ചിന്തിക്കുകയാണോ? സാൻഡ്വിച്ചിൽ അടങ്ങിയിരിക്കുന്ന ചേരുവകൾ തന്നെയാണ് അതിനു കാരണം. 23 കാരറ്റ് സ്വർണമാണ് ഇതിൽ ചേർത്തിരിക്കുന്നത്. എഡിബിൾ ഗോൾഡ് ഫ്ളേക്ക്സ് വിതറിയിട്ടിരിക്കുന്നത് മൂലമാണ് സാൻഡ്വിച്ചിനെ ഇത്രമാത്രം ചിലവേറിയതാക്കുന്നത്.
ലോകത്തിലെ ഏറ്റവും ചിലവേറിയ മിൽക്ക്ഷേക്കിനും ഫ്രഞ്ച് ഫ്രൈസിനുമുള്ള ഗിന്നസ് റെക്കോർഡ് കരസ്ഥമാക്കിയിരിക്കുന്നതും ഇതേ റെസ്റ്റോറന്റ് തന്നെയാണെന്ന സവിശേഷതയുമുണ്ട്.
