കലയുടെയും പ്രതിഭകളുടെയും സംഗമ വേദി, ‘വൈബ്സ് ബെംഗളുരു 2023’ ഈ മാസം 23 ന് ബെംഗളുരുവിൽ. മല്ലേശ്വരം ചൗദിയ മെമ്മോറിയിൽ ഹാളിൽ നടക്കുന്ന പരിപാടിയുടെ ഉദ്ഘാടനം പ്രശസ്ത സംവിധായകനും ജനം ടിവി ചെയർമാനുമായ പ്രിയദർശൻ നിർവഹിക്കും. കർണാടക മുൻ മുഖ്യമന്ത്രി ബിഎസ് യെദ്യൂരപ്പയാണ് മുഖ്യാതിഥി. കേന്ദ്ര മന്ത്രിമാരായ വി. മുരളീധരൻ, രാജീവ് ചന്ദ്രശേഖർ എന്നിവരും തേജസ്വി സൂര്യ എംപി, എപി അബ്ദുള്ളക്കുട്ടി, ജെ.നന്ദകുമാർ തുടങ്ങിയവരും ചടങ്ങിന്റെ ഭാഗമാകും.
കർണാടക ചലച്ചിത്ര അക്കാദമി ചെയർമാൻ സുനിൽ പുരാണിക്, കന്നഡ സിനിമാ താരങ്ങളായ സുചേന്ദ്ര പ്രസാദ്, മാളവിക അവിനാശ് എന്നിവരും ചടങ്ങിൽ പങ്കെടുക്കും. മലയാള ചലച്ചിത്ര സംവിധായകന്മാരായ എംബി പദ്മകുമാർ, പ്രവീൺ നാരായണൻ, വിഷ്ണു മോഹൻ എന്നിവരും ബെംഗളുരു വൈബ്സ് 2023 വേദിയിൽ എത്തും.
പ്രമുഖ താരങ്ങൾ പങ്കെടുക്കുന്ന കലാസന്ധ്യയാണ് പരിപാടിയുടെ പ്രധാന ആകർഷണം. നടനും ഗായകനുമായ സിദ്ധാർത്ഥ് മേനോൻ, നടിയും നർത്തകിയുമായ സരയു മോഹൻ, പ്രശസ്ത കൊരിയോഗ്രാഫർ നീരവ് ബവ്ലേജ, സുധീർ പറവൂർ എന്നിവർ ഉൾപ്പെടെ വൻ താരനിര തന്നെ കലാസന്ധ്യയുടെ വേദിയിൽ എത്തും.
സവിശേഷമായ കലയുടെയും പ്രതിഭകളുടെയും സംഗമ വേദിയാകും ‘ജനം ബെംഗളുരു വൈബ്സ് 2023’എന്ന് ജനം പ്രോഗ്രാം ഹെഡ് തിരൂർ രവീന്ദ്രൻ പറഞ്ഞു. ഗാർഡൻ സിറ്റിയിൽ നടക്കുന്ന കലാസംഗമത്തിലൂടെ കന്നഡ നാട്ടിൽ ഒരു പുതിയ തുടക്കത്തിന് ജനം നാന്ദികുറിക്കുകയാണ്. കലാ, സംഗീത, സാംസ്കാരിക, സാമൂഹിക മേഖലയിലെ പ്രതിഭകൾക്ക് വേദിയൊരുക്കുന്ന പരിപാടി കൂടിയാണ് ബെംഗളുരു വൈബ്സ് 2023 എന്നും രവീന്ദ്രൻ വ്യക്തമാക്കി.
