പെരുംജീരകം കഴിച്ചാൽ ഭാരം കുറയുമോ? നിരവധി ആളുകൾക്കിടയിൽ ഉയരുന്ന ഒരു ചോദ്യമാണിത്. ശരീരത്തിന്റെ ഭാരം കുറയ്ക്കാൻ പെരുംജീരകത്തിന് കഴിയുമെന്ന് തന്നെയാണ് ആരോഗ്യവിദഗ്ധർ ചൂണ്ടിക്കാട്ടുന്നത്. വിറ്റമിൻ സി, ഇ, കെ എന്നിവയും കാത്സ്യം, മഗ്നിഷ്യം, സിങ്ക്, പൊട്ടാസ്യം, സെലീനിയം, ഇരുമ്പ് എന്നീ ധാതുക്കളും ധാരാളം അടങ്ങിയിട്ടുള്ള പദാർത്ഥമാണ് പെരുംജീരകം. മലയാളികളെ സംബന്ധിച്ചിടത്തോളം പല ആഹാരങ്ങളിലും അൽപം പെരുംജീരകം ഉൾപ്പെടുത്തുന്നതാണ് ശീലം. മീൻ വറുക്കുന്നതിൽ പോലും ജീരകം വിതറുന്ന പതിവ് ചില അടുക്കളകളിലുണ്ട്.
പെരുംജീരകത്തിൽ ധാരാളം ഫൈബർ അടങ്ങിയിട്ടുണ്ട് എന്നതാണ് ശരീരഭാരത്തെ നിയന്ത്രിക്കാൻ സഹായിക്കുന്ന ഘടനം. ഈ ഫൈബറുകൾ ദഹനത്തെ സ്വാധീനിക്കുന്നു. ഭക്ഷണത്തിന് ശേഷം അൽപം പെരുംജീരകം കഴിക്കുകയാണെങ്കിൽ ദഹനത്തെ മന്ദീഭവിപ്പിക്കുകയും ശരീരത്തിലെ പഞ്ചസാരയുടെ അളവ് നിയന്ത്രിക്കുകയും ചെയ്യുന്നു. വിശപ്പ് അനുഭവപ്പെടുന്നതും ഇതുവഴി കുറയുന്നു. വിശപ്പിനെ അകറ്റി നിർത്തുന്നതിലൂടെ കഴിക്കുന്ന ഭക്ഷണത്തിന്റെ അളവ് കുറയുന്നു. ഇത് അമിത ഭാരം കുറയ്ക്കാൻ സഹായമാകുന്നു. ഉയർന്ന അളവിൽ നൈട്രേറ്റുകൾ അടങ്ങിയ ഒന്നാണ് പെരുംജീരകം. അതിനാൽ ഹൃദയത്തിന്റെ ആരോഗ്യം മെച്ചപ്പെടുത്താൻ സഹായിക്കുന്ന മികച്ച ഭക്ഷണ പദാർത്ഥം കൂടിയാണിത്. പെരുംജീരകം ശീലിച്ചാൽ ആരോഗ്യവും കാത്തുസൂക്ഷിക്കാം വണ്ണവും കുറയ്ക്കാമെന്ന് സാരം.
