ലക്നൗ: ജൽ ജീവൻ മിഷന്റെ വികസന പ്രവർത്തനങ്ങൾക്ക് സാക്ഷ്യം വഹിക്കാനായി യുപിയിലെ സ്‌കൂൾ വിദ്യാർത്ഥികൾ ഗ്രാമങ്ങളിലേക്ക് ‘ ജൽ ഗ്യാൻ യാത്ര’ നടത്തും. ഇതിനായി വിദ്യാർത്ഥികളുടെ മുൻഗണനാടിസ്ഥാനത്തിലെ പട്ടിക സംസ്ഥാന ജല ശുചിത്വ മിഷൻ ഓഫീസിൽ നൽകണമെന്ന് ആവശ്യപ്പെട്ട് അടിസ്ഥാന വിദ്യാഭ്യാസ വകുപ്പ് എല്ലാ ജില്ലയിലേയും വിദ്യഭ്യാസ സ്ഥാപനങ്ങൾക്ക് കത്തയച്ചു. ഈ മാസം ആരംഭിക്കുന്ന ജൽ ഗ്യാൻ യാത്രയിലൂടെ വിദ്യാർത്ഥികൾ ഗ്രാമീണ മേഖലയുമായി സമ്പർക്കം പുലർത്തും.
പദ്ധതി പ്രകാരം വിദ്യാഭ്യാസ സ്ഥാപനങ്ങളിലെ 10 വിദ്യാർത്ഥികളും അദ്ധ്യാപകരും പങ്കെടുക്കും. നാഷണൽ ഇന്നോവേഷൻ ക്യാംപെയ്നിന്റെ ഭാഗമായാണ് ഈ പദ്ധതിയി നടപ്പിലാക്കുന്നത്. കൂടാതെ ഇവർ 2022-23 ലെ പഠനയാത്രയിൽ പങ്കെടുക്കാത്തവരാണോയെന്നും ഉറപ്പ് വരുത്തും. യാത്രയിൽ പങ്കെടുക്കുന്ന വിദ്യാർത്ഥികളുടെ സുരക്ഷ ഉറപ്പാക്കിട്ടുണ്ടെന്ന് പൊതു വിദ്യാഭ്യാസ ഡയറക്ടർ അറിയിച്ചു. ജൽ ഗ്യാൻ യാത്രയുടെ ഭാഗമായി മലിന ജല ശുദ്ധീകരണ പ്ലാന്റും വിദ്യാർത്ഥികൾ സന്ദർശിക്കും. പദ്ധതിയുടെ ആദ്യഘട്ടത്തിൽ ലഖ്‌നൗ, കാൺപൂർ, ഗോരഖ്പൂർ, പ്രയാഗ്രാജ്, വാരണാസി, മഹോബ, ഝാൻസി എന്നിവിടങ്ങളിലേക്ക് സൗജന്യ യാത്ര നടത്തും. വിദ്യാർത്ഥികൾക്കായി വിവിധ മത്സരങ്ങളും യാത്രയോടനുബന്ധിച്ച് ഉണ്ടാകും. യാത്രയിലൂടെ വിദ്യാർത്ഥികൾക്ക് ജൽ ജീവൻ മിഷന്റെ ഹർ ഘർ യോജനയുടെ വികസനപ്രവർത്തനങ്ങളെ കുറിച്ചുള്ള വിവരങ്ങൾ ലഭിക്കും. ബുന്ദേൽഖണ്ഡ് പോലുള്ള പ്രദേശത്ത് ശുദ്ധജലം ഉറപ്പാക്കുന്നതിന് സർക്കാർ കൈവരിച്ച വിജയം വിദ്യാർത്ഥികൾക്ക് ബോധ്യപ്പെടുത്താനായി അവിടെയും സന്ദർശനം ഉറപ്പാക്കും.
നമാമി ഗംഗയും ഗ്രാമീണ ജലവിതരണ വകുപ്പും അടിസ്ഥാന വിദ്യാഭ്യാസ വകുപ്പും ചേർന്നാണ് ജൽ ഗ്യാൻ യാത്ര എന്ന പരിപാടി സംഘടിപ്പിക്കുന്നത്. ജൽ ജീവൻ മിഷൻ വഴി വിദൂര പ്രദേശങ്ങളിൽ പോലും ശുദ്ധമായ കുടിവെള്ള വിതരണം ഉറപ്പാക്കുന്നതിനുള്ള മുഴുവൻ പ്രക്രിയയ്‌ക്കും ഈ പരിപാടിയിലൂടെ വിദ്യാർത്ഥികൾ സാക്ഷ്യം വഹിക്കും.
