എറണാകുളം: കേരളത്തിലെ യുവതയെ കാണാൻ ഇന്നലെ കൊച്ചിയിലെത്തിയ പ്രധാനമന്ത്രി നരേന്ദ്രമോദിയുടെ റോഡ് ഷോയ്ക്ക് വൻ സ്വീകാര്യതയായിരുന്നു ലഭിച്ചത്. വെണ്ടുരുത്തി പാലത്തിനടുത്ത് നിന്ന് തുറന്ന വാഹനത്തിൽ കയറാതെ ഏറെ ദൂരം നടന്നത് മലയാളികളെ ഒന്നടങ്കം ഞെട്ടിച്ചു. സമൂഹമാദ്ധ്യമങ്ങളിലടക്കം പ്രധാനമന്ത്രി നടക്കുന്നത് വൈറലായിരുന്നു.
പുഷ്പവൃഷ്ടിയുടെ അകമ്പടിയോടെ കേരളീയ വേഷ്ടിയും ജൂബ്ബയും മേൽമുണ്ടും കസവുഷോളും അണിഞ്ഞുകൊണ്ടാണ് പ്രധാനമന്ത്രി റോഡ് ഷോയിൽ പങ്കുചേർന്നത്. ജയ് വിളിച്ചും മുദ്രാവാക്യങ്ങൾ മുഴക്കിയും ആർപ്പുവിളിച്ചും അദ്ദേഹത്തെ കേരളജനത വരവേറ്റു. റോഡിന് ഇരുവശത്ത് നിന്നും ജനങ്ങൾ പ്രധാനമന്ത്രിയ്ക്ക് നേരെ പുഷ്പവൃഷ്ടി നടത്തുകയായിരുന്നു.അവിടെയുള്ള ജനങ്ങളെ കൈവീശിയാണ് പ്രധാനമന്ത്രി നടന്നുനീങ്ങിയത്.
ഇപ്പോഴിതാ ആവേശത്തോടെ പൂക്കൾ എറിയുന്നതിനിടെ ആരുടെയോ കൈയിൽ നിന്ന് പ്രധാനമന്ത്രിയ്ക്ക് നേരേ ഒരു മൊബൈൽ ഫോൺ എത്തുന്നതും അതു വളരെ വേഗത്തിൽ തട്ടിയകറ്റുന്ന എസ്പിജി കമാൻഡോയുമാണ് സമൂഹമാദ്ധ്യമങ്ങളിൽ വൈറലാകുന്നത്. പ്രധാനമന്ത്രിക്കൊപ്പം നടക്കുകയായിരുന്ന എസ്പിജി കമാൻഡോ ആണ് അദ്ദേഹത്തിന് നേരേ എത്തിയ മൊബൈൽ പെട്ടെന്ന് കൈകൊണ്ടു തട്ടി തറയിൽ ഇട്ട ശേഷം കാലു കൊണ്ട് റോഡരുകിലേക്ക് തട്ടിമാറ്റിയത്. എന്നാൽ പൂക്കൾ എറിയുന്ന സമയത്ത് മറ്റൊരാളുടെ കൈ തട്ടി അബദ്ധത്തിൽ മൊബൈൽ ഫോൺ വീണാതാണെന്ന് പറയപ്പെടുന്നു. ഇതൊന്നും ശ്രദ്ധിക്കാതെ പ്രവർത്തകരെ അഭിവാദ്യം ചെയ്ത് പ്രധാനമന്ത്രി മുന്നോട്ടു നീങ്ങി.
Amazing reflex of PM Modi's SPG. Today during his roadshow at Kochi, someone threw a mobile along with flowers by mistake and see how the SPG personal reacted. pic.twitter.com/s4YhxJycEi
— നചികേതസ് (@nach1keta) April 24, 2023
