സിനിമാ മേഖലയിൽ ലിംഗ സമത്വമില്ലെന്ന് നടി ഗൗരി ജി കിഷൻ. ഒരു നടന് കൊടുക്കുന്ന ബഹുമാനമോ മതിപ്പോ നടിക്ക് ലഭിക്കുന്നില്ല. പല മുതിർന്ന സംവിധായകരോടും അഭിപ്രായം പറയാനുള്ള സ്വാതന്ത്ര്യമേ ഇല്ലാത്ത പോലെ തോന്നിയിട്ടുണ്ടെന്നും നടി ഗൗരി ജി കിഷൻ വ്യക്തമാക്കി. തന്റെ പ്രായം കാരണമാകാം ഇതെന്നും നടി പറഞ്ഞു.
‘സാഹിത്യവും ജേർണലിസവുമാണ് ഞാൻ പഠിച്ചത്. എഴുത്തിൽ എനിക്ക് താത്പര്യമുണ്ട്. സിനിമകൾ കാണാൻ എനിക്ക് ഭയങ്കര ഇഷ്ടമാണ്. പ്രാഥമികമായി നടിയെന്നല്ല പ്രേക്ഷകയായാണ് സ്വയം കരുതുന്നത്. നിന്നിൽ ഒരു സംവിധായികയുണ്ടെന്ന് പലരും എന്നോട് പറഞ്ഞിട്ടുണ്ട്. 96ന്റെ സംവിധായകനോട് എഴുതാനുള്ള താത്പര്യം ഞാൻ പറഞ്ഞിരുന്നു. 23 വയസ്സായല്ലേയുള്ളൂ, ഇപ്പോൾ നല്ല നടിയാണ്, കൂടുതൽ അനുഭവങ്ങൾ നേടൂ എന്ന് അദ്ദേഹം പറഞ്ഞു. സംവിധായികയാവുക എന്നത് 100 ശതമാനം ദുർഘടമായിരിക്കുമെന്ന് എനിക്ക് അറിയാം. അതിലേക്കുള്ള യാത്രയിലാണ് ഞാൻ. ഇനിയും കുറേക്കൂടി പഠിക്കാനുണ്ട്’- ഗൗരി കിഷൻ കൂട്ടിച്ചേർത്തു.
സിനിമയിൽ നടന്മാരേക്കാൾ കുറഞ്ഞ വേതനമാണ് നടിമാർക്ക് ലഭിക്കുന്നതിനെ ഗൗരി വിമർശിച്ചു- ‘പുരുഷാധിപത്യം സിനിമയിൽ മാത്രമല്ല വീടുകളിലും വിവേചനം ശക്തമാണ്. മാറ്റമുണ്ടാകുന്നുണ്ട്. പക്ഷെ മാറ്റം വളരെ പതുക്കെയാണ് നടക്കുന്നത്. മാർക്കറ്റ് വാല്യു എനിക്ക് അറിയില്ല. തുല്യ വേതനം നമ്മൾ ചെയ്യുന്ന ജോലിക്കാണ്. എന്തുകൊണ്ട് ഈ വിവേചനമെന്ന് എനിക്ക് മനസ്സിലാവുന്നില്ല’- ഗൗരി ജി കിഷൻ പറഞ്ഞു.
