മറ്റ് ഭാഷകളിലേക്ക് നിരവധി മലയാള ചിത്രങ്ങളാണ് റീമേക്ക് ചെയ്യുന്നത്. മലയാളത്തിലെ കലാമൂല്യമുള്ള ചിത്രങ്ങളുടെ റീമേക്ക് അവകാശങ്ങൾ സ്വന്തമാക്കി അതാത് ഭാഷകളിലെ സിനിമ ചേരുവകൾ ചേർത്താണ് അവിടുത്തെ പ്രേക്ഷകരുടെ മുന്നിൽ അവതരിപ്പിക്കുന്നത്. ആ ഭാഷകളിലെ പ്രേക്ഷകർ മിക്കവരും ഈ റീമേക്കുകൾ ഇരു കൈയും നീട്ടി സ്വീകരിക്കാറുണ്ട്. ഇപ്പോഴിതാ പൃഥ്വിരാജ്- മോഹന്‍ലാല്‍ ടീമിന്‍റെ ചിത്രവും തെലുങ്കിലേക്ക് എത്തുകയാണെന്നാണ് പുതിയ റിപ്പോര്‍ട്ടുകള്‍.
ലൂസിഫറിന് ശേഷം മോഹൻലാലും പൃഥ്വിരാജും വീണ്ടും ഒന്നിച്ച ബ്രോ ഡാഡി എന്ന ചിത്രമാണ് തെലുങ്കിലേക്ക് റീമേക്ക് ചെയ്യാപ്പെടാൻ ഒരുങ്ങുന്നത്. ചിരഞ്ജീവിയാണ് ചിത്രത്തിൽ മോഹൻലാലിന്റെ വേഷത്തിലെത്തുന്നത്. ചിരഞ്ജീവിയുടെ 156-ാം ചിത്രം (ചിരു 156) ഇതാകുമെന്നാണ് റിപ്പോർട്ടുകൾ നൽകുന്ന പ്രതീക്ഷ. ചിരഞ്ജീവിയുടെ മകൾ സുശ്മിത കൊനിഡേലയാണ് ചിരു 156 നിർമിക്കുന്നത്.
നിലവിൽ ഭോല ശങ്കർ എന്ന ചിത്രമാണ് ചിരഞ്ജീവിയുടേതായി തിയറ്ററുകളിൽ എത്താൻ പോകുന്നത്. തമിഴ് ചിത്രം അജിത്തിന്റെ വേതാളത്തിന്റെ റീമേക്കാണ് ഭോല ശങ്കർ. ഈ ചിത്രത്തിന് ശേഷമാകും മെഗസ്റ്റാർ ബ്രോ ഡാഡിയുടെ തെലുങ്ക് പതിപ്പിന്റെ ഭാഗമാകുക. നാഗചൈതന്യ ചിത്രം ബംഗരാജുവിന്റെ സംവിധായകൻ കല്യാൺ കൃഷ്ണയാകും ബ്രോ ഡാഡിയുടെ തെലുങ്ക് റീമേക്ക് സംവിധാനം ചെയ്യുക.
