കൊല്ലം: മദ്യലഹരിയിൽ പിങ്ക് പോലീസിന്റെ വാഹനം അടിച്ചു തകർത്ത യുവാവിനെ പിടികൂടി പോലീസ്. കൊല്ലം വാഴവിള സ്വദേശി ഹരിലാലിനെയാണ് പോലീസ് പിടികൂടി അറസ്റ്റ് ചെയ്തത്. പുനലൂരിലാണ് സംഭവം.
കഴിഞ്ഞ ബുധനാഴ്ച വൈകീട്ട് 5 മണിയോടെ പുനലൂർ കെഎസ്ആർടിസി ബസ് സ്റ്റാന്റിന് സമീപത്തുവെച്ചാണ് ഇയാൾ പോലീസിന്റെ കാർ അടിച്ച് തകർത്തത്. മദ്യപിച്ചെത്തിയ ഹരിലാൽ ബഹളം ഉണ്ടാക്കുകയും വാഹനങ്ങൾ തടയുകയും ചെയ്തു.
തുടർന്ന് ഇയാളോട് സ്ഥലത്ത് നിന്നും മാറി പോകാൻ പിങ്ക് പൊലീസ് ആവശ്യപ്പെട്ടിരുന്നു. ഇതിൽ പ്രകോപിതനായാണ് യുവാവ് അക്രമം നടത്തിയത്. റോഡരികിൽ കിടന്ന കോൺക്രീറ്റ് കട്ട ഉപയോഗിച്ചാണ് പിങ്ക് പോലീസിന്റെ കാറിന്റെ പിന്നിലെ ചില്ല് ഇടിച്ചു തകർത്തത്.
സംഭവമറിഞ്ഞ് സ്ഥലത്ത് കൂടുതൽ പോലീസ് എത്തിയാണ് ഹരിലാലിനെ പിടികൂടിയത്. നേരത്തെ മോഷണ കേസിലും ലഹരി മരുന്ന് കേസിലും അടിപിടി കേസിലും ഇയാൾ ശിക്ഷിക്കപ്പെട്ടിട്ടുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
Comments