തിരുവനന്തപുരം: ഓസ്‌കർ അവാർഡ് ജേതാവും പ്രശസ്ത സംഗീത സംവിധായകനുമായ എം.എം കീരവാണി ഇന്ന് തിരുവനന്തപുരത്ത്. തെലുങ്ക് ചിത്രമായ ആർആർആറിലെ ‘നാട്ടു നാട്ടു’ എന്ന ഗാനം ഒരുക്കിയതിന് ഓസ്‌കാർ പുരസ്‌കാരം നേടിയ ശേഷം ഇതാദ്യമായാണ് കീരവാണി തിരുവനന്തപുരത്തെത്തുന്നത്. വല്യത്ത് മൂവി പ്രൊഡക്ഷൻസിന്റെ ബാനറിൽ ബേബി ജോൺ വല്യത്ത് നിർമ്മാണവും സംവിധാനവും ഒരുക്കുന്ന ‘മജീഷ്യൻ’ എന്ന സിനിമയുടെ പൂജാ ചടങ്ങിൽ പങ്കെടുക്കുന്നതിനാണ് കീരവാണി തലസ്ഥാനത്ത് എത്തുന്നത്. വൈകീട്ട് അഞ്ചിന് അദ്ദേഹം ലുലുമാളിൽ എത്തും.
പൂജാ ചടങ്ങിൽ സാം ശിവ മ്യൂസിക് ബാന്റ് ഒരുക്കുന്ന എം.എം കീരവാണി ട്രിബ്യൂട്ടും ഉണ്ടാകും. മാത്രമല്ല ചിത്രത്തിലെ മൂന്നു ഗാനങ്ങൾക്ക് സംഗീതമൊരുക്കുന്ന കീരവാണിയെ ചടങ്ങിൽ ആദരിക്കുമെന്ന് അണിയറ പ്രവർത്തകർ അറിയിച്ചു. എം.എം കീരവാണിയ്‌ക്കൊപ്പം ചടങ്ങിൽ വിവിധ രാഷ്‌ട്രീയ, സാമുദായിക, സിനിമ മേഖലയിലെ പ്രമുഖർ പങ്കെടുക്കും.
1991-ൽ ഐ വി ശശി സംവിധാനം ചെയ്ത നീലഗിരി എന്ന ചിത്രത്തിലാണ് മലയാളത്തിൽ ആദ്യമായി കീരവാണി സംഗീത സംവിധാനം നിർവഹിച്ചത്. പിന്നീട് 1992-ൽ സൂര്യമാനസത്തിലും 1996-ൽ ദേവരാഗത്തിലൂടേയും കീരവാണി മലയാളികളുടെ മനം കവർന്നു. ഇന്ന് വിവിധ ഭാഷകളിൽ നിറസാന്നിധ്യമാണ് കീരവാണി.
