ലഖ്നൗ: 2027ലെ ഉത്തര്‍പ്രദേശ് നിയമസഭാ തിരഞ്ഞെടുപ്പിന് മുന്നോടിയായി സംസ്ഥാനത്ത് രാഷ്‌ട്രീയ-സംഘടനാ പ്രവര്‍ത്തനങ്ങള്‍ ശക്തമാക്കാന്‍ ബിജെപി. പ്രധാനമന്ത്രി നരേന്ദ്ര മോദി ഒക്ടോബര്‍ അവസാനത്തോടെ സംസ്ഥാനത്ത് വിവിധ പരിപാടികളിലും റാലികളിലും പങ്കെടുക്കാന്‍ സാധ്യതയുണ്ടെന്നാണ് റിപ്പോര്‍ട്ട്. വാര്‍ത്താ ഏജന്‍സിയായ എഎന്‍ഐയെ ഉദ്ധരിച്ചുള്ള വിവരങ്ങളാണ് പുറത്തുവന്നത്. ഒക്ടോബര്‍ 25ന് വാരാണസിയിലെ നമോ ഘട്ടില്‍ നിര്‍ദേശിക്കപ്പെട്ടിട്ടുള്ള വ്യോമപ്രദര്‍ശനത്തില്‍ പങ്കെടുക്കാനാണ് പ്രധാനമന്ത്രി എത്തുന്നതെന്നാണ് വിവരം. കേന്ദ്ര പ്രതിരോധമന്ത്രി രാജ്നാഥ് സിങ്, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് തുടങ്ങിയവരും പരിപാടിയില്‍ പങ്കെടുക്കുമെന്നാണ് പ്രതീക്ഷിക്കുന്നത്. പ്രധാനമന്ത്രിയുടെ സന്ദര്‍ശനവുമായി ബന്ധപ്പെട്ട അന്തിമ പരിപാടിപ്പട്ടിക ഇതുവരെ പ്രഖ്യാപിച്ചിട്ടില്ല.
നിയമസഭാ തിരഞ്ഞെടുപ്പിനുള്ള ഒരുക്കങ്ങളുടെ ഭാഗമായി സംസ്ഥാനത്തെ 18 ഡിവിഷനുകളിലായി ഏകദേശം 12 പരിപാടികളും റാലികളും സംഘടിപ്പിക്കാനാണ് ബിജെപി ആലോചിക്കുന്നതെന്നാണ് പാര്‍ട്ടി വൃത്തങ്ങളെ ഉദ്ധരിച്ചുള്ള റിപ്പോര്‍ട്ട്. വിവിധ സര്‍ക്കാര്‍ പദ്ധതികളുടെ ഉദ്ഘാടനം, വികസന പദ്ധതികളുടെ ശിലാസ്ഥാപനം, പൊതുയോഗങ്ങള്‍ എന്നിവ പരിപാടികളുടെ ഭാഗമായേക്കും. സംസ്ഥാനത്തിന്റെ വിവിധ മേഖലകളില്‍ പ്രധാനമന്ത്രിയുടെ സന്ദര്‍ശനങ്ങള്‍ ക്രമീകരിക്കുന്നതിനുള്ള വിശദമായ പദ്ധതി തയ്യാറാക്കിവരികയാണെന്നും റിപ്പോര്‍ട്ടില്‍ പറയുന്നു.
കേന്ദ്ര ആഭ്യന്തരമന്ത്രി അമിത് ഷാ, ബിജെപി ദേശീയ അധ്യക്ഷന്‍ നിതിന്‍ നബിന്‍, മറ്റ് മുതിര്‍ന്ന നേതാക്കള്‍ എന്നിവരെ പങ്കെടുപ്പിച്ചുള്ള പരിപാടികളും ആസൂത്രണം ചെയ്യുന്നുണ്ട്. പാര്‍ട്ടിയുടെ സംഘടനാ സംവിധാനം ശക്തിപ്പെടുത്തുക, പ്രവര്‍ത്തകരുമായി സംവദിക്കുക, ജനങ്ങളിലേക്കുള്ള പ്രചാരണം വ്യാപിപ്പിക്കുക എന്നിവയാണ് ലക്ഷ്യമിടുന്നത്. തിരഞ്ഞെടുപ്പ് തീയതികള്‍ പ്രഖ്യാപിക്കുന്നതിന് മുമ്പായി സംസ്ഥാനത്ത് രാഷ്‌ട്രീയ-സംഘടനാ പ്രവര്‍ത്തനങ്ങള്‍ കൂടുതല്‍ സജീവമാക്കാനാണ് ബിജെപിയുടെ നീക്കം. എന്നാല്‍ പരിപാടികളുടെ തീയതികളും പ്രധാനമന്ത്രിയുടെ അന്തിമ സന്ദര്‍ശനക്രമവും ഔദ്യോഗികമായി സ്ഥിരീകരിച്ചിട്ടില്ല.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
2022ലെ നിയമസഭാ തിരഞ്ഞെടുപ്പില്‍ 403ല്‍ 255 സീറ്റുകള്‍ നേടിയാണ് ബിജെപി അധികാരം നിലനിര്‍ത്തിയത്. പാര്‍ട്ടിയുടെ വോട്ടുവിഹിതം 41.29 ശതമാനമായിരുന്നു. മുന്‍ മുഖ്യമന്ത്രി അഖിലേഷ് യാദവിന്റെ നേതൃത്വത്തിലുള്ള സമാജ്വാദി പാര്‍ട്ടി 111 സീറ്റുകളും 32.06 ശതമാനം വോട്ടും നേടി. ബഹുജന്‍ സമാജ് പാര്‍ട്ടിക്ക് ഒരു സീറ്റും കോണ്‍ഗ്രസിന് രണ്ട് സീറ്റുകളുമാണ് ലഭിച്ചത്. ബിഎസ്പിയുടെ വോട്ടുവിഹിതം 12.88 ശതമാനവും കോണ്‍ഗ്രസിന്റേത് 2.33 ശതമാനവുമായിരുന്നു. 2022ലെ തിരഞ്ഞെടുപ്പില്‍ നേടിയ മുന്നേറ്റം നിലനിര്‍ത്തുന്നതിനൊപ്പം സംഘടനാ പ്രവര്‍ത്തനം ശക്തമാക്കി 2027ലെ പോരാട്ടത്തിന് തയ്യാറെടുക്കുകയാണ് ബിജെപി.
