പത്നിയായ തടാതകാദേവിയുടെ ആഗ്രഹം സഫലീകരിക്കുവാന് സുന്ദരേശ്വന് ഏഴ് സമുദ്രങ്ങളെ മധുരയില് വരുത്തിയ ലീലയാണ് ഒന്പതാമത്തെ ലീല .
സുന്ദരേശന് പാണ്ഡ്യരാജാവായി രാജ്യം ഭരിച്ചപ്പോള് ആ പ്രദേശം ഐശ്വര്യസമൃദ്ധമായി ഭവിച്ചു.ആധിയും വ്യധിയും [മനോദുഖവും രോഗവും] ദാരിദ്രവും പുത്രദുഖവും അപമൃത്യുവും അവിടെ ഉണ്ടായില്ല.എല്ലാ വിഭാഗക്കാരും സ്വധര്മ്മാനുഷ്ടാനങ്ങളില് ശ്രദ്ധിച്ചുകൊണ്ട് ജീവിതം നയിച്ചു.ഭ ക്തപ്രിയനായ ഭഗവാന്റെ സാന്നിധ്യം കൊണ്ട് ഹാലാസ്യം ശിവലോകം പോലെ ആയി.
രാജോചിതമായ വേഷഭൂഷാദികള് ധരിച്ച് പാണ്ഡ്യരാജേശ്വരനായി സിംഹാസനത്തിലിരുന്ന് സുന്ദരേശ്വരന് രാജ്യം ഭരിച്ചു. അക്കാലത്ത് മഹര്ഷിമാര് ഭഗവാനെ ദര്ശിക്കുവാന് അവിടെ ആഗതരാകാറുണ്ട്.അവര് പറയുന്ന പുരാണകഥകള് ശ്രവിച്ച് തടാതകാദേവിയുടെ മാതാവായ കാഞ്ചനമാലയും ജീവിതം നയിച്ചു.ഒരു ദിവസം അവിടെ സന്നിഹിതനായ ഗൗതമ മഹര്ഷിയോട് കാഞ്ചനമാല ഉത്തമധര്മ്മങ്ങള് ഏതെല്ലാമാണെന്ന് ചോദിച്ചു.അപ്പോള് അദ്ദേഹം മൂന്ന് ധര്മ്മങ്ങളെ ക്കുറിച്ച് പറഞ്ഞു.മാനസികം,വാചികം,കായികം എന്നിവയാണ് അവ.സകല ജീവജാലങ്ങളോടുമുള്ള ദയ,സത്യം ,ധര്മ്മചിന്ത ,ക്ഷമ,സന്തോഷം,ധ്യാനം ,ആര്ജ്ജവം [വക്രബുദ്ധിയില്ലായ്മ], ഇന്ദ്രയനിഗ്രഹം[മനോനിയന്ത്രണം] എന്നിവയാണ് .മാനസധര്മ്മങ്ങള്.പലതരത്തിലുള്ള സ്തുതികളും മന്ത്രങ്ങളും ജപിക്കുന്നത് വാചികധര്മ്മം.
എല്ലാ സുഖങ്ങളും മോക്ഷവും നല്കുന്ന പഞ്ചാക്ഷരമന്ത്രജപം [നമ:ശിവായ ] അത്യുത്തമവും ദുരിതങ്ങളെ നശിപ്പിക്കുന്നതും ആണ്. ശിവലിംഗാഭിഷേകം,പ്രദക്ഷിണം ,പൂജ ,നമസ്കാരം ,പൂജാപുഷ്പങ്ങള് ശേഖരിക്കല് ,ക്ഷേത്രം ശുചീകരിക്കല്, തീര്ത്ഥയാത്രകള് തുടങ്ങിയവയാണ് കായികധര്മ്മങ്ങള്.
സമുദ്രസ്നാനം ചെയ്താല് എല്ലാ തീര്ത്ഥങ്ങളിലും സ്നാനം ചെയ്ത പുണ്യം ലഭിക്കും .ഭൂമിയിലുള്ള സകല തീര്ത്ഥങ്ങളും സമുദ്രത്തില് ലയിക്കുന്നതുകൊണ്ട് സമുദ്രസ്നാനം അത്യന്തം പുണ്യപ്രദമാണ്.ഇത്രയും കാര്യങ്ങള് ഗൗതമ മഹര്ഷിയില് നിന്ന് അറിഞ്ഞപ്പോള് കാഞ്ചനമാലയ്ക്ക് സമുദ്രസ്നാനം ചെയ്യണമെന്ന ആഗ്രഹം ഉണ്ടായി .ഈ ആഗ്രഹം പുത്രിയായ തടാതകയോട് പറഞ്ഞു.ദേവി അമ്മയുടെ ആഗ്രഹം പതിയെ അറിയിച്ചു.മാതാവ് സാഗരസ്നാനം ചെയ്യുവാന് ആഗ്രഹിക്കുന്നുവെങ്കില് സപ്തസാഗരങ്ങളേയും വരുത്താമെന്നും ആഗ്രഹം സാധിപ്പിക്കാമെന്നും സുന്ദരേശ്വന് അരുളി.
ശങ്കരഭഗവാന് സ്വന്തം ശക്തിയാല് സമുദ്രങ്ങളെ വിളിച്ചപ്പോള് അവ അവിടെ വന്നുചേര്ന്നു. ഏഴുസമുദ്രങ്ങള് മധുരയില് എത്തിയപ്പോള് ജനങ്ങള് ആശ്ചര്യഭരിതയായി .സപ്തസമുദ്രങ്ങളുടെയും സാന്നിധ്യം ഭഗവാന്റെ ക്ഷേത്രത്തിന് മുമ്പില് വിളങ്ങുന്ന ജലാശയത്തിലുണ്ട്. ആ പുണ്യ സരസ്സിന് ‘സപ്താബ്ധി’ എന്ന നാമവും സിദ്ധിച്ചു.ഈ സരസ്സില് സ്നാനം ചെയ്താല് സകല ദുരിതങ്ങളും നശിക്കുകയും ആഗ്രഹങ്ങള് സാധിക്കുകയും ചെയ്യും.അവിടെ തര്പ്പണം ചെയ്യുന്നവര്ക്ക് പിതൃക്കളുടെ തൃപ്തി കൊണ്ടുണ്ടാകുന്ന അനുഗ്രഹവും സിദ്ധിക്കും .
അടുത്ത ഹാലാസ്യ ലീല 10 : മലയധ്വജാനയനം
അവലംബം – ഹാലാസ്യമാഹാത്മ്യം കിളിപ്പാട്ട്
ഈ ലിങ്കിൽ ക്ലിക്ക് ചെയ്താൽ ഹാലാസ്യ മാഹാത്മ്യത്തിന്റെ എല്ലാ ലേഖനങ്ങളും പ്രസിദ്ധീകരിക്കുന്ന മുറക്ക് ക്രമമായി ലഭിക്കും
https://janamtv.com/tag/halasya-mahatmyam/
കെ രാധാമണി തമ്പുരാട്ടി
ഫോൺ 8281179936
ആലപ്പുഴ സനാത ധർമ്മ വിദ്യാലയത്തിൽ അധ്യാപികയായിരുന്നു ലേഖിക .ഔദ്യോഗിക രംഗത്തു നിന്ന് വിരമിച്ച ശേഷം ആധ്യാത്മിക രചനകൾ നിർവ്വഹിച്ചുകൊണ്ടിരിക്കുന്നു .
ശിവാവതാരങ്ങൾ, ശിവകഥാമൃതം, (ഡി സി ബുക്സ്), ശിവജ്ഞാനാമൃതം, ശിവസ്തോത്രമാല, ശിവമഹാസ്തോത്രവും ശിവസഹസ്രനാമവും (കേരളാ ബുക്ക് ട്രസ്റ്റ് കോഴിക്കോട്), ശിവപുരാണ സംഗ്രഹം (ഗുരുവായൂർ ദേവസ്വം), എന്നീ പുസ്തകങ്ങൾ പ്രസിദ്ധീകരിച്ചിട്ടുണ്ട് .
