ലക്നൗ : റോഡിനു മദ്ധ്യേ ബസ് നിർത്തി നിസ്ക്കരിക്കാൻ പോയ ജീവനക്കാരെ സസ്പെൻഡ് ചെയ്ത് യുപി സർക്കാർ . ബറേലിയിൽ നിന്ന് ഗാസിയാബാദിലെ കൗശാംബി സ്റ്റോപ്പിലേക്ക് പോവുകയായിരുന്ന ബസിലെ ഡ്രൈവറും , കണ്ടക്ടറുമാണ് ബസ് റോഡിനു മദ്ധ്യേ നിർത്തി നിസ്ക്കരിക്കാൻ പോയത് .
സത്യേന്ദ്ര എന്ന വ്യക്തിയാണ് ഗതാഗത വകുപ്പ് ആസ്ഥാനത്തേക്ക് പരാതി ട്വീറ്റ് ചെയ്തത് . തന്റെ പരാതിയ്ക്കൊപ്പം സത്യേന്ദ്ര സംഭവത്തിന്റെ വീഡിയോയും അയച്ചിരുന്നു . ഈ വീഡിയോയിൽ ഇസ്ലാമിക വേഷം ധരിച്ച 2 പേർ റോഡിൽ നിസ്കരിക്കുന്നത് കാണാം. പ്രാർഥനയ്ക്കായി കണ്ടക്ടർ യാത്ര നിർത്തിയതിനെതിരെ ബസിലെ യാത്രക്കാർ പ്രതിഷേധിക്കുന്നതും കാണാം. എന്നാൽ ഇതിനെല്ലാം മറുപടിയായി കണ്ടക്ടർ യാത്രക്കാരെ ഉപദേശിക്കുന്നതും ദൃശ്യങ്ങളിലുണ്ട്.
“രാത്രിയിൽ ഞാൻ ബറേലിയിൽ നിന്ന് ബസിൽ കയറി. ആരുടെ പുറപ്പെടൽ സമയം 7 മണിയായിരുന്നു . രാത്രി 8:25ന് ബസ് നിർത്തി. ഞാൻ നോക്കിയപ്പോൾ കണ്ടത് 2 പേർ ബസിൽ നിന്ന് ഇറങ്ങി ബസ്സിന് മുന്നിൽ ഇരുന്നു നിസ്ക്കരിക്കാൻ തുടങ്ങി. ബറേലി ഡിപ്പോയിലെ ARM, SM, RM എന്നിവരോട് ഞാൻ പരാതിപ്പെട്ടു.“ സത്യേന്ദ്ര പറയുന്നു . സത്യേന്ദ്രയുടെ ഈ പരാതിയിൽ, അടുത്ത ദിവസം തന്നെ നടപടി സ്വീകരിച്ചതായി ബറേലി ഡിപ്പോയിലെ എആർഎം അറിയിച്ചു. ബസിലെ ഡ്രൈവറെ സസ്പെൻഡ് ചെയ്തതായും കണ്ടക്ടറുടെ കരാർ അവസാനിപ്പിച്ചതായും എആർഎം അറിയിച്ചു.
