പുതിയ ഒരു അദ്ധ്യയനവർഷത്തിന് തുടക്കം കുറിച്ചു കഴിഞ്ഞു. കുട്ടികൾ വീണ്ടും പഠനത്തിന്റെ ലോകത്തേയ്ക്ക് പ്രവേശിച്ചു. എന്നാൽ, മിക്ക കുട്ടികളുടെയും പ്രധാന ഭയം പരീക്ഷ തന്നെ. സ്കൂൾ കുട്ടികളിൽ മാത്രമല്ല, മുതിർന്ന വിദ്യാർത്ഥികളിലും പരീക്ഷാ പേടി കണ്ടുവരാറുണ്ട്. പരീക്ഷയെ ഭയന്ന് പലരും ജയിക്കാൻ വേണ്ടിയുള്ള കുറുക്കു വഴികൾ തേടി പോകുന്നു. എന്നാൽ ജീവിതത്തിൽ ഒരു വിജയം നേടണമെങ്കിൽ പരീക്ഷയെ ധൈര്യപൂർവ്വം നേരിട്ടെ മതിയാവൂ. പരീക്ഷാ പേടി വിദ്യാർത്ഥികളുടെ ശാരീരികവും മാനസികവുമായ ആരോഗ്യത്തെ തന്നെ ബാധിച്ചേക്കാം. പരീക്ഷയിൽ പരാജയപ്പെടുമെന്ന ഭയം, മുൻ പരീക്ഷകളിൽ ലഭിച്ച കുറഞ്ഞ മാർക്ക്, മതിയായ തയ്യാറെടുപ്പിന്റെ അഭാവം എന്നിവയെല്ലാം വിദ്യാർത്ഥികളിൽ പരീക്ഷ പേടിക്ക് കാരണമായേക്കാം. ചില കാര്യങ്ങൾ ശ്രദ്ധിച്ചാൽ ഈ പരീക്ഷ പേടിയെ നമുക്ക് മറികടക്കാൻ സാധിക്കും.
ടൈംടേബിൾ അനുസരിച്ച് പരീക്ഷയ്ക്ക് തയ്യാറെടുക്കുക
പരീക്ഷയ്ക്കായി നന്നായി തയ്യാറെടുത്തിട്ടുണ്ട് സ്വയം ഉറപ്പു വരുത്തേണ്ടതുണ്ട്. ഇതിനായി ടൈംടേബിൾ പ്രകാരം പഠനം ആരംഭിക്കുക. പരീക്ഷയ്ക്ക് നന്നായി തയ്യാറെടുത്തിട്ടുണ്ടെങ്കിൽ തന്നെ വിദ്യാർത്ഥികളുടെ പേടി കുറയും. ചെറിയ ഇടവേളകൾ എടുത്ത് വേണം പഠിക്കാൻ. ഇങ്ങനെ ചെയ്താൽ വിദ്യാർത്ഥികളുടെ മാനസിക പിരിമുറുക്കം കുറയും.
പകൽ സമയത്ത് പഠിക്കാൻ ശ്രമിക്കുക
പരമാവധി പകൽ സമയത്ത് പഠിക്കാൻ ശ്രമിക്കുക. സമയം വൈകിയാൽ വിദ്യാർത്ഥികളുടെ ശ്രദ്ധ വ്യതിചലിക്കാനുള്ള സാധ്യതകൾ ഏറെയാണ്. ദിവസവും 7 മുതൽ 8 മണിക്കൂർ വരെ വിദ്യാർത്ഥികൾ ഉറങ്ങണം. ഇത് മാനസികാരോഗ്യം മെച്ചപ്പെടുത്തും. മാത്രമല്ല പഠനത്തിനായി ഇരിക്കാൻ നമ്മെ ഊർജ്ജസ്വലമാക്കും.
ദിവസവും വ്യായാമം ചെയ്യുക
ആവശ്യത്തിന് വെള്ളം കുടിക്കുക. ശരീരത്തിൽ ജലാംശം നിലനിർത്തേണ്ടതുണ്ട്. ശരീരത്തിന് ആവശ്യമായ പോഷകങ്ങൾ ലഭിക്കുന്ന ഭക്ഷണം കഴിക്കണം. ഒപ്പം, പരീക്ഷയെപ്പറ്റിയുള്ള ഉത്കണ്ഠ കുറയ്ക്കാൻ ദിവസവും വ്യായാമവും ചെയ്യുക.
നെഗറ്റീവ് ചിന്തകളെ മാറ്റിനിർത്തുക
സ്വയം പോസിറ്റീവായിരിക്കാൻ ശ്രമിക്കുക. നിങ്ങളുടെ നെഗറ്റീവ് ചിന്തകളെ മാറ്റി നിർത്തി നല്ല മനോഭാവത്തോടുകൂടി പരീക്ഷകളെ സമീപിക്കുക. ഇതിലൂടെ പരീക്ഷാ പേടിയെ മറികടക്കാൻ വിദ്യാർത്ഥികൾക്ക് ഒരു പരിധിവരെ സാധിക്കും.
Comments