പത്തനംതിട്ട: അയ്യപ്പഭക്തർക്ക് ഇനി മുതൽ ഓൺലൈനായി കാണിക്ക അർപ്പിക്കാം. ഇതിനായി ഇ-കാണിക്ക സൗകര്യമൊരുക്കി തിരുവിതാംകൂർ ദേവസ്വം ബോർഡ്. https://sabarimalaonline.org/#/login എന്ന വെബ്സൈറ്റിൽ പ്രവേശിച്ച് എവിടെയിരുന്നും കാണിക്ക അർപ്പിക്കാവുന്നതാണ്.
ടാറ്റാ കൺസൾട്ടൻസി സർവീസിന്റെ സീനിയർ ജനറൽ മാനേജരിൽ നിന്ന് കാണിക്ക സ്വീകരിച്ചാണ് ഉദ്ഘാടന കർമ്മം നിർവഹിച്ചത്. ദേവസ്വം ബോർഡ് ആസ്ഥാനത്തെ കോൺഫറൻസ് ഹാളിൽ നടന്ന ചടങ്ങിൽ ദേവസ്വം ബോർഡ് പ്രസിഡന്റ് അഡ്വ.കെ അനന്തഗോപൻ ആണ് സംവിധാനത്തിന്റെ ഉദ്ഘാടന കർമം നിർവഹിച്ചത്.
നേരത്തെ ശബരിമല ദർശനത്തിന് വെർച്വൽ ക്യൂ സംവിധാനം നടപ്പിലാക്കിയതിന് പിന്നാലെയാണ് ഇ-കാണിക്കയും. വെർച്വൽ ക്യൂ സംവിധാനവും ടാറ്റാ കൺസൾട്ടൻസി സർവീസിനെയാണ് ഏൽപ്പിച്ചിട്ടുള്ളത്. അടുത്ത ചിങ്ങ മാസത്തോടെ ഇതിനുള്ള പൂർണ സജ്ജീകരണങ്ങൾ ഒരുക്കും. ഇ-കാണിക്ക വരുന്നതോടെ സന്നിധാനത്തെ ഭണ്ഡാരങ്ങളിൽ പണം നിക്ഷേപിക്കുന്നവരുടെ എണ്ണത്തിൽ കുറവ് വന്നാൽ പിന്നീട് ഇത് എണ്ണിത്തിട്ടപ്പെടുത്തുന്ന ബുദ്ധിമുട്ടും കുറയുമെന്നാണ് വിലയിരുത്തൽ.
Comments