ദേവലോകത്ത് വാഴുന്ന മലയധ്വജരാജാവിനെ മധുരയില് വരുത്തിയതാണ് ഹാലാസ്യനാഥന്റെ പത്താമത്തെ ലീല.
സപ്തസാഗരങ്ങളും മധുരയില് വന്നപ്പോള് സുന്ദരേശ്വരന് പത്നിയായ തടാതകാദേവിയോടൊപ്പം അവയെ ദര്ശിച്ചു. മാതാവിനെ അതില് സ്നാനം ചെയ്യിപ്പിക്കുവാന് നിര്ദ്ദേശിച്ചു. മാതാവിനെ ഈ കാര്യം അറിയിക്കുവാന് ദേവി പോയി. അപ്പോള് സുന്ദരേശ്വരന് സ്വന്തം ശക്തിയാല് സമുദ്രങ്ങളുടെ വേഗത ശമിപ്പിച്ചു. പിന്നീട് അവിടെയുള്ള ഉദ്യാനത്തിലെ സുന്ദര ദൃശ്യങ്ങള് ദര്ശിച്ചും ആസ്വദിച്ചും സമയം നീക്കി. ജഗദീശ്വരിയായ തടാതകാദേവി പതിയുടെ ആജ്ഞയനുസരിച്ച് മാതൃസമീപം ചെന്ന് ഏഴ് സമുദ്രങ്ങളും എത്തിയ കാര്യം പറഞ്ഞു. അപ്പോള് കാഞ്ചനമാല താന് കൃതാര്ത്ഥയായി എന്ന് വിചാരിച്ചു. സമുദ്രസ്നാനം ചെയ്യേണ്ടതെങ്ങനെയെന്ന് പുരാണങ്ങളും ശാസ്ത്രങ്ങളും അറിയാവുന്ന പണ്ഡിതന്മാരോട് ചോദിച്ചു. അവര് ഇങ്ങനെ മരുപടി നല്കി.
‘നാരിമാര് സ്വന്തം പതിയോടൊപ്പം സ്നാനം ചെയ്യണം. വിധവകളാണെങ്കില് പുത്രനോടൊപ്പം സ്നാനം ചെയ്യണം. അതിനും സാധിക്കാത്തവര് ഒരു പശുക്കുട്ടിയെയും കൊണ്ട് സ്നാനം ചെയ്യണം. എങ്ങനെയായാലും സ്ത്രീകള് പരസഹായത്തോടുകൂടി മാത്രമാണ് സ്നാനം ചെയ്യേണ്ടത്.’
ഇത്രയും അറിഞ്ഞപ്പോള് പതിയും പുത്രനും ഇല്ലാത്ത താന് സമുദ്രസ്നാനം ചെയ്യുന്നതെങ്ങനെയാണെന്നുള്ള ചിന്ത കാഞ്ചനമാലയെ അസ്വസ്ഥയാക്കി. ഈ കാര്യം പുത്രിയോട് പറഞ്ഞു. തടാതകാദേവി പതിയേയും ഈ കാര്യം അറിയിച്ചു. അപ്പോള് ഭഗവാന് ദേവരാജധാനിയില് വാഴുന്ന മലയധ്വജരാജാവിനെ അവിടെ എത്തുവാന് സ്മരിച്ചു. പെട്ടെന്ന് രാജാവ് വിമാനത്തില് അവിടെ എത്തി. സുന്ദരേശ്വരന് അദ്ദേഹത്തെ ആലിംഗനം ചെയ്യതതിനുശേഷം പത്നിക്ക് പിതാവിനെ കാണിച്ച് കൊടുക്കുകയും നമസ്കരിപ്പിക്കുകയും ചെയ്യ്തു. പതിയോടൊപ്പം കാഞ്ചനമാലയെ ഏഴ് സമുദ്രങ്ങളിലും സ്നാനം ചെയ്യിച്ചു. അനന്തരം ശിവന്റെയും ശിവയുടെയും രൂപത്തോടു കൂടി മൂല ലിംഗത്തെ പ്രണമിച്ചതിനുശേഷം അവര് ശിവലോകം പ്രാപിച്ചു. പ്രസന്നയായ തടാതകാദേവി ഭഗവാന് സുന്ദരേശ്വരനെ സ്തുതിച്ചു. സ്തുതിയില് സംപ്രീതനായ ഭഗവാന് ദേവിയെ അനുഗ്രഹിച്ചു.
ജഗദീശ്വരനായ ശങ്കരഭഗവാന് സര്വ്വലോകത്തിനും സന്തോഷം നല്കുന്ന വിധം ദേവിയോടുകൂടി മധുരാപുരിയെ പാലിച്ച് സസന്തോഷം വസിച്ചു. അക്കാലത്ത് തടാതകാദേവി ഗര്ഭിണിയായി. ലൗകികാചാരമനുസരിച്ച് അവര് പ്രസന്നരായി.പത്താമത്തെ ഈ ലീല പാപനാശനവും സദ്ഗുണ പ്രധാനവും മോക്ഷദായകവും ആണെന്നാണ് ഫലശ്രുതി.
അടുത്ത ഹാലാസ്യ ലീല 11 : രാജപുത്രോദ്ഭവം
അവലംബം – ഹാലാസ്യമാഹാത്മ്യം കിളിപ്പാട്ട്
ഈ ലിങ്കിൽ ക്ലിക്ക് ചെയ്താൽ ഹാലസ്യ മാഹാത്മ്യത്തിന്റെ എല്ലാ ലേഖനങ്ങളും പ്രസിദ്ധീകരിക്കുന്ന മുറക്ക് ക്രമമായി ലഭിക്കും
https://janamtv.com/tag/halasya-mahatmyam/
കെ രാധാമണി തമ്പുരാട്ടി
ഫോൺ 8281179936
ആലപ്പുഴ സനാത ധർമ്മ വിദ്യാലയത്തിൽ അധ്യാപികയായിരുന്നു ലേഖിക .ഔദ്യോഗിക രംഗത്തു നിന്ന് വിരമിച്ച ശേഷം ആധ്യാത്മിക രചനകൾ നിർവ്വഹിച്ചുകൊണ്ടിരിക്കുന്നു .
ശിവാവതാരങ്ങൾ, ശിവകഥാമൃതം, (ഡി സി ബുക്സ്), ശിവജ്ഞാനാമൃതം, ശിവസ്തോത്രമാല, ശിവമഹാസ്തോത്രവും ശിവസഹസ്രനാമവും (കേരളാ ബുക്ക് ട്രസ്റ്റ് കോഴിക്കോട്), ശിവപുരാണ സംഗ്രഹം (ഗുരുവായൂർ ദേവസ്വം), വൈശാഖ മാഹാത്മ്യം (തീരഭൂമി ബുക്സ് ), എന്നീ പുസ്തകങ്ങൾ പ്രസിദ്ധീകരിച്ചിട്ടുണ്ട്.
Comments